Derheqê muxabîra MA’yî Ceylan Şahînlî de seba qiseykerdişê aye yo derheqê kiştişê rojnameger Nazim Daştan û Cîhan Bîlgîn de cipersayîş ame destpêkerdene.
Muxabîra Ajansê Mezopotamyayî Ceylan Şahînlî 23ê kanûna 2025î de eşkerayîya sînorê Pirsûs û Kobanî de qisey kerdbi û kiştişê rojnameger Nazim Daştan û Cîhan Bilgîn şermezar kerdbi. Mudirîyetê Polîsan ê Rihayî riyê nê qiseykerdişê vengda Ceylan Şahînli kerd ke şêra îfade. Şahînlî do ewro şêra Mudirîyetê Polîsan ê Rihayî îfade bida.
Komela Rojnamegeran a Dîcle Firatî (DFG) hesabê xo yê medyaya dîjîtale ser o nerazîbîyayîş nîşanê cipersayîşî da û vat: “Herinda ke kiştişê rojnamegeran bêro cigêrayêne û berpirsîyarî rê cipersayîş bidê destpêkerdene, çi heyf ke derheqê rojnamegeran de ke beşdarê çalakîya protestoyî bîyê, cipersayîş yeno destpêkerdene. Ma reyna vanê: Nazim û Cîhan rojnameger ê û ma do rêç û dewaya înan ra fek veranêdê. Ma do hesabê nê kiştişî bipersê. #RojnamegerîSucNîyo.”
