Şaristanê Siwêdayî yê Sûrîye bi zêdebîyayîşê pirodayîşan, sîvîlî saetanê serê sibayî ra benê şahîdê pêlê hêrişanê rasterast ê top û hewanan. Cinî û gedeyî zî tede hêrişî benê sebebê merg û birîndarbîyayîşê sîvîlan û rijîyayîşê keyeyan.
Qirkerdişê ke hetê çeteyanê bi çek ê girêdayeyê hukmato demkî yê Sûrîye ra yenê kerdene, bi rijnayîşê keyeyan, kîlîse û sembolan dewam kenê. Encamê hêrişanê vera kesayetanê neteweyîyan de, pirodayîşê ke Siwêda de vejîyayê orte, dewam kenê. Hedîseyê ke qewimîyenê mîyanê şarî de benê sebebê hêrsî. Herême de hêrişê Îsraîlî vera nuqtayanê leşkerî dewam kenê.
Goreyê xeberanê herême ame dîyarkerdene ke saetanê serê sibayî yê ewroyî ra şaristanê Siwêda ya Sûrîye de hewan û guleyê topan danê keyeyan ro û na rewşe gede û cinî zî tede bena sebebê birîndabîyayîşê xeylê kesan. Çeteyê girêdayeyê hukmato demkî erzenê keyeyan ser o, sekvanan bi ca kenê û slogananê mezhebîyan erzenê.
Hêrişan de cinî, gede û extîyaran cuya xo vîndî kerd
Çeteyê girêdayeyê hukmato demkî yê Sûrîye demo ke erzenê keyeyan ser o, cinî, gede û extîyar ferq nêkeno, hêrişê şarî kenê. Hedîseyan de xeylê cinî, gede û extîyaran cuya xo vîndî kerd. Hûmara merde û birîndaran nêyena zanayene. Hêzê ewlekarîyî yê girêdayeyê hukmato demkî dekewtişê nêweşxaneyan de nuqtayê kontrolî ronayî û tankî bi ca kerdê. No zî bîyo sebeb ke mîyanê şarî de ters bibo. Gedeyan ra yew ke ey resnayo nêweşxane, riyê mudaxeleyo erey ra cuya xo vîndî kerda.
Eynê çeteyî bêserûber guleyan erzenê, dikanan texrîb kenê û talan kenê. No rijnayîşo ewleyî, beno sebebê xorînbîyayîşê krîzanê merdimîye.
Heto bîn ra çeteyê ke dewanê rojava de yê, koçê girseyî yê şarî ra îstîfade kenê û wesayîtê ke aîdê sîvîlanî şuxulnenê, keyeyê înan yenê talankerdene û veşnenê. Na rewşe bi kêmbîyayîşê mudaxeleyan reyde, trajedîyo ke şar ciwîyeno, ano rewşêka hîna têmîyankewta.
