Stenbol de vera hêrişê polîsan ê ziwanê kurdkî ser o beyanatêk da. Beyanat de vajîya ke: “Destanê xo qilerinan ma ser de biancê.”
Tewr peynî Stenbol de keyeyê Kaya demê agêrayîşê seyranî, seba ke wesayîtê xo de deyîranê bi ziwanê kurdkî goşdaritî, hetê polîsan ra vîdeo û resmê înan ameyo antiş û bi îşkenceyê ameyî destbendkerdêne.
Deme destbendkerdêne de Zeynep Yaman a dicanîye zî estbî. Çi heyf ke Zeynep Yamane zî raştî hêrişê polîsan amê, polîsan paşkul pîzeyê Zeynep Yamane ra da û no ser zî Zeynep Yaman bi rêbazê sezeryanî bi lezûbez ame amelîyatkerdiş. Telûkeyê cuye yê tutî domyeno.
Stenbol de vera hêrişê polîsan ê ziwanê kurdkî ser o Platformê Demokrasî û Kedî yê Dêrsimî beyanetêk da.
Beyanat rê perabesteyanê platformî û zaf hûmarî de welatijî beşdar bîyî û beyanat de bi kirmanckî pankartê “Zonê ma kamîya mawa, zonê ma haştîya û azadiya zonê ma sera, destanê xo biancê” ame akerdene.
Beyanat Hemserekê DEM Partîye yê Dêrsimî Ozcan Ateşî bi kirmanckî wend.
Beyanat wina yo:
“Na zere haştîye de no çi halo,
Suka Estanbolîde, ju çê ebe araba xo şîyêne çe xo. Zerê arabe xo de zonê kirmancîye de goştarîya kilaman kerdêne. Polîsan araba egle kerde, zerê araba de kam est o kerdî teber û pê îşkence girotî binê çiman. Nînan ra ju cinîke domanan neweşe bîye, polîsan ra va ‘ez dicanî ya’ reyna zî polîsan îşkence kerd û cinike biye rehetsiz û xestexane de pê sezeryan pitê xo ard dina. Cinike û pit hetê weşîye ra binê talukeyî de rê. Ma sey şarê Dêrsimî nê zîhnîyetî rind nas kenîme. 38 de zerê cinikan amêne sungîkerdene, nika reyna a raye ramenê.
Roja ewroyîne de qalê haştîye û birayîye yeno kerdene, ma şimara çitorî înam bibime. Destanê xo qilêrinan ma ser ra bancê. Dewleta Tirke ra ma vanîme ke “Endî bes o. Ma kirmancan û zonê ma kirmancan endî bivênê. Qomê kirmancan est o, zonê ma kirmanckîyo. Raya ma kirmanckîya, ma zonê xo de kilaman vanîme.”
