Partîya Herêman Demokratîkan serrgêra Rojawanî ser o eşkerayêka nuştekî da. DBP’î nuşteyê xo de dîyar kerd ke modelê Rojawanî tekane çarenûsê krîzanê Rojhelatê Mîyanênî yo.
Rojhelatê Kurdistanî û Sûrîye de serra 2011î de şerê zereyî dest pê kerd. Dima şerê zereyî zaf hêzê paramîlîterî herême de vejîyayî holî û dest bi qirkerdişê şaran kerdî. Hêzê hegemoyî ke berjewendîyê înan herême de estîbî, paştgirî înan hêzan dayî. DAIŞ’î bi paştgirîya înan hêzan Sûrîye û Iraq de zaf cayan îşxal kerdî. DAIŞ ke artêşa 2 dewletan nêeşkaye verê ci bigîro, Yewîneyê Pawitişê Cinîyan (YPJ) û Yewîneyê Pawitişê Şarî (YPG) Kobanê de verê ci girewtî û seba heme şaranê cîhanî bîyî rûmetê merdimeyîye.
Dima têkberdişê DAIŞ’î şaristanê Kurdistanê Rojawanî de 19ê Temuze 2012î de serê cû şarê kurdî û şarê herême yê ke uca de ciwîyenî, bi nameyê “Şoreşê Rojawanî” yew gam dest pê kerdî. Bi Şoreşê Rojawanî reyde zaf vurnayîşî herême de aver şîyî. Bînkeyeyê herême û şaristanê ke hêrişan de rijyabî reyna ameyî awankerdene.
Partîya Herêman Demokratîkan serrgêra Rojawanî ser o eşkerayêka nuştekî da.
Eşkeraya DBP’î wina yo:
“Sedeqetêko bêsînor, xoverdayîşêko bêhempa û serkewtişêko ke heme şaranê bindestan ê dinya rê bî çimeyê hêvî û bawerîye. Şorişê Rojawanî bandora xo ya dinya ser o domneno.
Adirê xoverdayîşo ke Şorişê Rojawanî rê ber akerd, 13 serran verî ewro 19ê temmuza 2012yî de Kobanê de panîya. Hemverê tarîyîya seserre, hemverê xeyalanê binê cumleya “Kobanê keweno” de bi serkêşîya cinîye û ciwanan şaranê azadîwazan xo kerd mertal û pêro hesabê îşxalkeran veng vetî. Xoverdayîşo ke nê rojan dest pêkerd, prosesê newî rê ber akerd. No proses serkewtişê şaran, serkewtişê têkoşînê enternasyonalîstî bî. No proses heman wext de hemverê Modernîteya Kapîtalîste prosesê serkewtişê Modernîteya Demokratîke bî.
Raştîya ke ewro şexsê Sûrîye de Rojhelatê Mîyanênî de ciwîyena, nê heqîqetî peyda kena. Xoverdayîşo ke Kobanê de dest pêkerd û heme cografya ser o tesîr kerd, netîceyê tarîxî afernayî. Rijîyayîşê rejîmê Baasî yê 61 serran nê netîceyanê tarîxîyan ra yew bî. Yewna şorişî azadîya şaranê Rojawanî ra ber, gêrayîşê azadî yê şaranê bindestan rê zî netîce daye. Gandarbîyayîşêkê newî dest pêkerd.
Bêguman no gandarbîyayîş pratîkê têkoşînê zîhnî yê Rayberê Şarê Kurdî Abdullah Ocalanî bî. Na felsefe krîzanê sîyasîyan û komelanê Rojhelatê Mîyanênî rê bîye xerîtaya çareserîye. Ereb, sûryanî, armenî, tirkmen û kurd tede şarê herême vera ferasetê yewperestî sayeyê na xerîta bi îradeyê xo ewro ameyoxê xo yê azadî saz kenê. Rewşa ke ewro şarê dûrzî û elewî yê Sûrîye ciwîyenê zî nîşan dana ke ganî heme hêz û şarê herême xerîtaya Birêz Ocalanî esas bigêrê.
Şorişê Rojawanî û Manîfestoyê Birêz Ocalanî vizêrî zî ewro zî tekane raya çareserîye û berzkerdişê erjanê merdimî yo. Coka 19ê temmuza 2012yî ra nata wayîrvejîyayîşê heme helanê prosesê şorişî, wayîrvejîyayîşê ameyox û cuya rûmetdar o.
Wayîrvejîyayîşê destkewteyanê şorişî û xerîtaya çareserîye hertim sey mesuldarîyêka tarîxî do rojeva ma ya esasî ra yew bibo. Bi na mesuldarîye ma heme şehîdanê şorişî yewna bi rêzdarî û minet anê xo vîrî.”
