MÎT, bi paştîya HTŞ’yî wazena ke fîtîlê hêrişanê neweyan bîveşno; Dêrazor, Reqqa û Tebqa de bi nameyê “Artêşa Eşîran” hucreyanê rakewteyan keno fealîyet.
MÎT û grubê çeteyan ê cîhadîstan ê HTŞ’yî ke demêko derg o vera şarê durzîyan ke meclîsê xo yê leşkerî awan kerdo û waştişê Rayeberîya Xosere kerdo, plananê leyminan virazenê. Înana îdîa kerd ke mîyanê durzîyan û eşîranê bedewîyan ê sunîyan de pêrodayîş vejîyayo û dest bi hêrişanê qetlîamî yê vera şarê durzîyan kerd. MÎT û HTŞ, bi eynî metod û polîtîkayanê leyminan, bi hucreyanê ke Dêrazor, Reqqa û Tebqa de bi nameyê “Artêşa Eşîran” kerdê fealiyet, plan kenê ke fîtîlê hêrişêkê neweyî bîveşnî.
Demê peyênî de, herêmanê Dêrazor, Reqqa û Tebqa û rojhelatê Sûrîye de, çalakîya hucreyanê rakewteyan ke bi nameyê “Artêşa Eşîran” fealiyet mojnenê, zêdîyaya. Na çalakîye, bi paştîya hêzanê zereyî û teberî, hedef kena ke Rojawan û Rojhelatê Sûrîye de xo vila bikero.
Verîyeyê ey û têkilîya ey a bi rejîmê kehenî ra
Goreyê malûmatanê ke Lekolin.orgî dest visto, nê hucreyî hetê Musab El-Hefelî ra ke birayê şêxê eşîra El-Egedatî Îbrahîm El-Hefel o, yenê îdarekerdene. Îbrahîm El-Hefelî, piştîdayîşê rejîmê verênî yê Sûrîye de rolêko muhîm kay kerd û hewl da ke ajandayê Îranî yê herême de aver bero, la wexto ke ser nêkewt, remayê Şam.
Goreyê malûmatanê ke ma çimeyanê xo yê bawerkerdeyan ra teyîd kerdê, Îbrahîm El-Hefel ke Şam de nîşeno ro, xizmetê menfeetanê îqtîdarê neweyî yê Şamî keno û birayê ey Musab zî fealiyetanê hucreyan ê Rojawan û Rojhelatê Sûrîye koordîne keno. Îbrahîmî, verîya rijîyayîşê rejîmê Esadî, bi şuxulnayîşê nufûzê eşîran, hewl da ke mîyanê ereban û kurdan de fîtneyêka mezhebî virazo.
No plan, hedef kerdêne ke serwerîya rejîmê verênî yê Şamî û Îranî herême ser o xurt bikero, la bi redkerdişê paştîdayîşî yê eşîranê ereban, ser nêkewt. No plan, parçeyê stratejîyêka hîrayêre yo ke dewleta tirke ya îşxalkere bi destê MÎT’î kena. Ma verî zî gelek rey deşîfre kerdbî ke MÎT planan virazeno ke qey herêmanê Rojawanê Sûrîye ke zafêrî kurd ê, bigîro binê kontrolê xo, demografîke bivurno û eşîran bişuxulno.
Îttîraq bi DAIŞ û HTŞ’yî ra
Goreyê malûmatanê ke Adara 2025î de, kombîyayîşêk de ke hetê DAIŞ’î ra deştê Şamî Heresta û Eyn Terma de ame viraştene, vera Rojawan û Rojhelatê Sûrîye hêrişî ameyî plankerdene. Goreyê malûmatanê ke lekolin.org dest vistî, musayî ke HTŞ û MÎT no kombîyayîş ra xeberdar bîyê û paştî dayo planî. Dest kewt ke dewleta tirke, bi wasitayê MÎT’î, teklîf kerdo ke nê hêrişî bi nameyê “Artêşa Eşîran” hetê Îbrahîm û Musab El-Hefelî ra bêrê îdarekerdene. Bi nê hawayî, wazenê ke têkilîyanê eşîran ser o mîyanê ereban û Hêzanê Sûrîyeya Demokratîke (HSD) û Rayberîya Xosere de pêrodayîşêk virazî.
Planê MÎT’î yê Dêrazorî û Artêşa Eşîran
Dewleta tirke, çarçiweya “Planê Rijînayîşî” de ke 2015 de dest pêkerdo, herêmanê Rojawanê Sûrîye ke binê kontrolê kurdan de yê, hedef girewto. No plan, ji 2023î nat bi konseptêkê neweyî hîra biyo û MÎT hedef keno ke bi şuxulnayîşê grubanê eşîran, herême de kaos virazo.
Reyna serê nê çalakîyanê seha de, organê medyayî yê girêdayeyê dewleta tirke û îqtîdarê HTŞ’yî, geşkerdişê pêrodayîşanê Rojawanî rolêko aktîf kay kenê. Nê organê medyayî, bi toranê trolan ê platformanê medyayê sosyale reyde koordînelî, vera Rayberîya Xosere û HSD’yî kampanyayanê leyminayîşî yê sîstematîkan rayra benê.
Na kampanyaya leymine ke hedef kena mîyanê ereban û kurdan de fîtne virazo; serê xeberê ke vanê Rayberîya Xosere zext û heqaretê eşîranê ereban kena û bi nê hawayî rayaumûmîye şaş kena, awan bîya. Reyna, bi hacetanê medyayê şerê xusûsî, vengdayîşêko provokatîf yeno şuxulnayene ke hedef keno, hîsanê mezhebîyan û eşîretîyan biqaharno. Bi nê hawayî, no hewldayîşêko ke seba ke hucreyê rakewteyê bi nameyê “Artêşa Eşîran” hêriş bikerê, zemînê sîyasî û sosyalî yeno amadekerdene.
Wina senaryoyê fîtneyê mezhebî yê rejîmê verênî, Îranî û Tirkîya ke verî ser nêkewtbî, yeno dibare kerdene. Nê têgêrayîşî, çarçiweya mudaxeleyanê zereyî û teberî yê kompleksan de qewimîyenê ke hedef kenê ke Sûrîye de nexşeyê nufûzî, bi bedelê asayîş û îstîqrarî, newe ra şekil bidê.