Selîm Yildirimo ke birayê ci tepişteyo nêweş Mehmet Saît Yildirimî 30 serrî zîndan de yo, vera bêhuqûqîya ke zîndanan de yena domnayene nêrazîbîyayîş mojna û va: ”Gerek goreyê ruhê prosesîb bêro têgêrayene.”
Zîndananê Kurdîstan û Tirkîya de binpaykerdişanê heqan dewam kenê. Tewr peynî de Zîndanê Xarpêtî de tepişteyan vera îşkence û binpaykerdişê heqanê dest pê grevê vêşanîye kerd. Tehlîyeya bi seyan tepişteyan bi qeraranê keyfîyan yena peydeeştene.
Birayê tepişteyê nêweşîyî Mehmet Saît Yildirimî yo ke 30 serrî yo zîndan de yo, Selîm Yildirimî vera bêhuqûqîya ke zîndanan de yena domnayene nêrazîbîyaîş mojna û va bi na bêhuqûqîye warê asayîşî nîno pêardene.
Mehmet Saît Yildirim (73) nêweşo giran o. Menga sibate de cezaya ci qedîyaye û la seba ke o poşman nêbîyo, tehlîyeya ci hetê Heyetê Îdare û Çimdarîye ra hende 9 mengan peyde ameye eştene.
Birayê ci Selîm Yildirimî no sey huqûqê dişmenîye name kerd û va na bêhuqûqîye vera bi seyan tepişteyan yena kerdene. Selîm Yildirimî nê vatî: “Vera şarê kurdî zulm yeno kerdene. Bi vengdayîşê Birêz Ocalanî proses dîya destpêkerdene. Nê prosesî de semedê haştîye têna hetê kurdan veng da. Şarê tirkî û dewlete goreyê ruhê prosesî tênêgêra. Tepişteyê nêweşê ke serbest veranêdîyayî. Îşkence dewam keno. Înfazî bi hewayêkê keyfî yenê peydeeştene. Ez bi xo DGM de ameya muhakemekerdene, o wext hendê nika bêhuqûqîye çîn bê. Çîyê ke ewro yenê kerdene o dewr zî xo dima veradayo. Birayê mi 2015 de ame berdene Îmrali la seba ke nêweşê qelbî yo bado 9 rojan ame berdene zîndano bîn. Birayê mi têna hucre de yeno tepiştene, eke rewşa ci bibo giran çew çîno mudaxale bikero. Rixmê qerarê Qanûnê Bingeyî nêgerîyeno cayê embazanê ci.”
