GOÇ-DERî seba waştişê cagirewtişê komîsyono ke do bêro ronayene, Meclîsî rê waştişnameyêk erşawit.
Komela Çimdarî û Cigêrayîşê Koçî ya Mezopotamya (GOÇ-DER), verê banê PTT’yî yê ke Semtê Ofîsî yê qezaya Yenîşehîrî de yo, derheqê telebê xo yê cagirewtişê komîsyono ke Meclîs de do bêro ronayene de beyanat da.
Îdarekarê GOÇ-DER’î Hakan Şekerî ke beyanat wend, da vîrî ke serranê 1990î de çerçiweya polîtîkayanê ewleyîye yê dewlete de bi hezaran dewê ameyê vengkerdene û bi se hezaran merdimî cayê xo ra ameye vetene.
Şekerî ke îzeh kerd ke serrê 1990î nêeşkîyeno tenya sey cavurnayîşêko fîzîkî bêrê destgirewtene, çîke eynî wext de hafizaya komelî de birînê xorî akerdê û wina va: “Merdimê ma yê ke dewê înan ameyê vengkerdene, wextê koçî de muameleya xirab, îşkence, trawmayê psîkolojîkî û tayê weziyetan de binê çiman de vînîbîyayîşan rê maruz mendê û dramêko giran ê merdimîye cuyayê. Nê pêlê ca ra kerdişî yê bi zorî tenya zereyê welatî de nê, heta serê sînorî zî resayo. Bi hezaran merdimî, cayanê xo yê cuyaye ra ameyê birnayene û şertanê giranî de mecbur mendê ke xo biresnê kampanê sey Mexmurî. Têkoşînê cuyaye ke ewro hema zî Mexmur de dewam keno. Netîceyê nê koçî hema zî rojevîya xo paweno.”
Waştişê cagirewtişê komîsyonî
Şekerî veng da ke verê agêrayîşê dewan bêro akerdene û wina domna: “Ma, sey Komela Çimdarî û Cigêrayîşê Koçî ya Mezopotamya, wazenî ke her xebata ke hem seba rîbirî mendişê bi demê vîyarteyî hem zî seba akerdişê verê agêrayîşan domîyanê ci de ca bigê. Na çarçewe de ma wazenê ke komela ma zî komîsyonanê eleqedaran ê ke plan beno Meclîsê Girdî de bêrê ronayene de ca biga. Ma sey GOÇ-DER ma hadre yê ke na mesulîyete bigê û bibî parçeyêkê prosesê rîbirî mendişî.”
Dima eşkerayîye waştişnameyê ke seba cagirewtişê komîsyonê ke Meclîs de do bêro ronayene ameybî hedrakerdene, ameyî erşawitene.
