Amed – Endama MYKê ya DBPê Elîf Tîrenç Îpek anî ziman ku tevlibûna gel a civînan pir germ e û destnîşan kir ku gel bi Rêberê Gelê Kurd Abdullah Ocalan bawer e.
Piştî banga dîrokî ya Rêberê Gelê Kurd Abdullah Ocalan a di 27ê Sibatê de, ji bo çareseriya pirsgirêka Kurd di çarçoveya mercên demokratîk û aştiyane de gelek gav hatin avêtin. Piştî bangê bi pêşengiya Partiya Wekhevî û Demokrasiyê ya Gel (DEM Partî), Partiya Herêmên Demokratîk (DBP), Tevgera Jinên Azas (TJA), Buroya Asrin Hiqûq, rêxistinên ked û pîşeyî ve nêzî 150 navendî “Civînên Gel ên ji bo Aştî û Civaka Demokratîk” hatin lidarxistin. Di civînan de bi hezaran welatî beşdar bûn û bang, pêvajo hate nirxandin. DEM Partiyê û saziyên din di 1ê Hezîranê de li Kurdistan û li Tirkiyeyê biryara civîna li 2 hezar navendî da. Heta niha zêdeyî hezar û 500 navendî civînên gel pêk hat. Civînên gel dê hata 31ê Tîrmehê bidomin. Civînên gel li Amed, Mêrdîn, Riha, Şirnex, Sêrt, Agirî, Qers, Erzirom, Îdir, Wan û gelek bajarên din berdewam dike. Endama MYKê ya DBPê Elif Tirenç Îpek Ûlaş, têkildarî civînên gel û helwesta gel a li hemberî pêvajoyê ji Ajansa Welat re axivî.
Endama MYKê ya DBPê Prz. Elif Tirenç Îpek Ûlaş ku ji bo aştî, demoqrasî, wekhevî û bi taybet ji bo azadiya jinê bi destûra jin – Jiyan – Azadî têdikoşe çavdêriyên xwe yên li ser civînên gel parve kir. Elîf Tîrenç îpek anî ziman ku Rojhilata Navîn û Kurdistan di pêvajoyeke girîng re derbas dibe û wiha got: “100 sal di ser metingeriya Kurdistan û herême re derbas bû. Kurdan ji bo hebûn û azadiya xwe tekoşînek bêhempa da. Roj û salên ku em tê re derbas dibin divê encamê vê tekoşînê derxe holê. Ji bo gel zêdetir tevlî vê pêvajoyê bibe û rêxistina gel qewîntir bê kirin em van civînan pêk tînin.”
Emîf Tîrenç Îpek da zanîn ku ev civîn, di pêşengtiya TJA, DBP, DEM Parütiyê de tên amadekirin û rêvebirin û wiha axivî: “Hemû hêzên demokratîk û rêxistinên sivîl ên ku dixwazin beşdarî pêvajoya aştiyê bibin jî di nav plansaziyê de cih digirin. Ji bo hevdîtinê bi gel re, li tax û gundên bakurê Kurdistanê û metropolên Tirkiyeyê civîn têne lidarxistin. Em hewl didin ku nirxandin, fikar, pirs û hêviyên wan ên di derbarê pêvajoyê de guhdarî bikin û fêm bikin.”
Tevlibûna gel pir germ e
Li ser tevlêbûna civînan Elîf Tîrenç îpek destnîşan kir ku nêzîkî du mehan in, bi hezaran kes beşdarî civînan bûn û wiha pêde çû: “Ez bi xwe jî li Amedê beşdarî van civînan dibim. Nêzikbûn û tevlîbûna gel zêde zêde germ e. Bi hestiyarîyek kelecan e.”
Sînevîzyonê didin temaşekirin
Têkildarî naveroka civînan jî Elîf Tîrenç Îpek bilev kir ku di civînande perspektîfê partiyê tê xwendin û wiha lê zêde kir: “Li ser perspektifan nirxandin û şîrovekirin gelek zindî derbas dibin. Sînevizyona birêz Ocalan tê temaşe kirin. Li ser viya jî gel dîtin û ramanên xwe tînê ziman. Piratîkên şaredarîyên me û pêdivîyen gel tên nikaşkirin. Li ser pêvajoyê gel fikar û gumanên xwe tîne ziman.”
Elîf Tîrenç Îpek bibîr xist ku meraq, fikar û gumanên gel zêde ne û wiha got: “Gel ji dewletê ne bawer e. Hestên bêbaweriya dewletê zêde ne. Ji xapandinê û durûtiya dewletê ditirse. Nediyarbûna destxistinê gel û civakê gel zêde ditirsîne. Hin tiştan gel hem fêm nake hem qebûl nake. Bi taybetî, nebûna kiryarên berbiçav ji aliyê dewletê ve heta niha astengiyeke cidî li pêşiya têgihîştin û qebûlkirina pêvajoyê ji aliyê raya giştî ve diafirîne. Bo nimûne; pir caran pirsên ‘Ka ger gavên berbiçav neyên avêtin, entegrasyon dê çawa pêk bê?’ dipirsin.”
Li ser daxwaz û bendewariyê gel jî Elîf Tîrenç çavdêriyên xwe wiha parve kir: “Gel dixwaze destkeftiyê civakê bên parastin. Gel dixwaze muxatab zimanê xwe rast bikin û girtiyên siyasî serbest berdin. Dixwaze dewlet teqez mafên Kurdan û gelan ên civakî û siyasî qebûl bike û bi zagonan mîsoger bike.”
Kêmasiyên şaredariyan rexne dikin
Elîf Tîrenç da zanîn ku gel nediyariyên pêvajoyê rexne dike û got: “Zimanê dewletê pêvajoyê pêş naxe. Yek alî ye. Gel dîsa şaredariyên me şîrove dikin. Sistî û kêmasîyan wan rexne dikin û qebûl nakin. Kêmasiyan bi tundî rexne dikin.”
Gel rêveberan rexne dike
Têkildarî tevlêbûna jinan jî Elîf Tîrenç wiha axivî: “Tevlîbûna jinan ji hêla girseyî ve baş e. Bes ji ber ku demsal a xebatê ye, tevlîbûn hinek kêmtir e. Sedemek din jî ji bilî dema hilbijartinan neçûyina cem gel a partî û şaredariyan e. Gel pergala ku ji hilbijartinekê heta hilbijartina din, diçin serdanê red û rexne dike. Li hin deveran, çalakiya civînê bi xwe, ne tenê nîqaşkirina pêvajoyê, moral, coş û bextewariyek girîng diafirîne. Bi gelemperî jin û ciwan herî zêde meraq dikin ka pêvajo çi ye. Lê, piştî nîqaşên me yên hevkariyê, em dubare dibînin ku jin û ciwan ew kes in ku herî zêde pêvajoyê dipejirînin.”
Elîf Tîrenç bersîva pirsa “Çima jin zêdetir berê xwe didin aştî û demoqrasiyê?” bersivand û got: “Ji ber ku di şer û pevçûn û aloziyande jin du car, sê car … zêde tên pelçiqandin. Civaka di bin zilmê de jî li jinê zilmê dike. Her çend ev faktora sereke be jî, jinan di nîv-sedsala şer de bedela herî giran dane. Lê dîsa jî wan qet dev ji banga aştiyê bernedane. Îro, bêçekkirina çekan di bin pêşengiya jinan de pêşve diçe û dê berdewam bike.”
Gel bi Rêberê xwe bawer e
Endama MYKê ya DBPê Elîf Tîrenç Îpek nêzîkatiya gel a li hemberî Rêberê Gelê Kurd Abdullah Ocalan jî nirxand û got: “Helwesta gel li ber daxûyanîya birêz Ocalan gelek germ û hestiyar e. Gel bi rêberê xwe ewleye. Berpirsiyarî û nûnertiya wî qebûl dike û biwîrebûna xwe tund tîne ziman. Gel ji ber nêzîkatiyên dewletê bi fikar nêzî pêvajoyê dibe. Ji ber vê yekê zêdetir çavdêriyê dike. Ji ber vê yekê xebata esasî rêxistinkirina civakê ye. Gel bê fikar tev li civînan û rêxistinê dibe. Lê divê mirov bêtir gel tev li rêxistinkirinê bike. Ji ber vê yekê em ê demên pêş de xebatên komunan bimeşînin. Xebatên komunan perspektifa vê demê ye. Civîn û serdanên gel di heman demê de perspektifa rêxistinkirinê ye.”
