Şênîyê dewa Serdenîyî Mehmet Yilmazî dîyar kerd ke madenê Çemê Sarûmî daristan û awanê herêmî ziwa kerdî û waşt ke ganî her kes bibo vengê înan û wina va: “Ma wazenî şarê ma bêro ewta veng bido vengê ma.”
Kurdistan de talankerdişê xozayî bêmîyan dewam keno. Amed de her koyî, zozanî û çemî bi destê cigêrayîşê madenî yenê talankerdene. Dar û daristanî yenê çinkerdene, heywanê herêmî kêm benî. Yew zî nê herêman ra Çemê Sarûmî yo. Çemê Sarûmî bi destê sondaj û madenî yeno talankerdene. Çemê Sarûmî mîyanê Pasûr û Lîce de yo. Şênîyê herême seba talankerdişê xozayî komele awan kerdê û ard û awê xo pawenî.
Şenîyê dewa Serdenîyî Mehmet Yilmazî derheqê xozaya Çemê Sarûmî û talankerdişê herêmî de ajansê ma rê (AW) qisey kerd.
‘Meşt de do her çikî rê erê bo’
Mehmet Yilmazî dîyar kerd ke o dewa Serdenîyî ra yo û wina qisey kerd: “Dewa ma serê Çemê Sarûmî ya, bi destê madenî wazenî ardê ma talan bikerî. Ma zî bertek nîşan danî ke vanî; ma sondaj û maden nêwazenî. Wa xozaya ma, senî bav û kalê ma ra, ma rê mend, wa wina bimano. Yew het ra talankerdişê xozayî, yew hetê bînî ra zî bêvengîya şarî est a, no zî ma zaf xemgîn keno. Meşte do her çîkî rê erê bibo. Ma şarê xo ra wazenê ke dar û daristananê xo ra wayîr bivejî. Ma ardê xo ra wayîr nêvejî kesêk ardê ma ra wayîr nêvejî. Nê 3 serrî yo herêma Çemê Sarûmî de gêrayîşê madenî dest pê kerdo. Yew aweka zelale Çemê Sarûmî ra herikîyena, çend masî binê awe de estbî mojnîyenî. Labelê no maden nêro vindarnayene na awe do êdî nêherikîyo.”
‘Ma ewta de pawitişê merdîmeyîye kenê’
Mehmet Yilmazî destnîşan kerd ke çem û daristanî tena, înan nîyê û nê çîyî ard ziwan: “Eke ewro ez ardê Licê pawena, no do bandorê pêro ardê Kurdistan û Tirkîya bikero. Meywe û bacanê sor tiya ra heme şaristanan vila beno. Ma tiya de pawitişê xoza û merdimeyîye kenê. Ewro awa herême ziwa bîya. Ez 66 serrî ya mi çîyêko wina nêdîyo. Nê 3 serrî yo tiya de dest bi gêrayîşê madenî ame kerdiş û awanê ma yê ke bi hezaran serran o herikîyenî ziwa bîyî. Tiya de zaf dar û daristanî estbî labelê nê daristanî heme wişk bîyî. Sebebê nê heme çîyan sondaj û maden ê.”
“Heywanê ke tiya de est ê tu cayî de çin ê”
Mehmet Yilmazî ard ziwan ke ê wazenî ke dewlete baş bifikiro û wina qedîna: “Şîrketê teberî ewro tiya de xozayî talan kenî. Ma wazenî nê karî bêrî vindarnayene. Ma wazenî şarê ma bêro ewta veng bido vengê ma. Sondaj bi qasî 700 metre binê ardî keno. Bi na sondaj zî gaz vejeno û zirar dano xozayî. Cayêk çin o ke heywanê tiya şirî. Şaneyê marî est o tiya de, no şaneyê marî tu welatî de çin o.. Darkobikê 3 hebî tiya de ciwîyenî. Yew înan ra rengê nê ardê sûrî, yew reş û sîpî, yew zî rengê xwelîya adirî yo. Lazim o ke ma nê heywanan ra wayîr bivejî û êdî bes o, şima çi ardê ma ra wazenî, ma bivajê. Cayo ke awe çin o cuye zî çin o. Zaf dewijê bi awe debara xo kenî. Eke ewro o awe şira, do kam zirarê înan dewican bido? Xeripnayîş zaf rihet o. Bila şîrket û dewlete destê xo ardê ma ra biancê. Ma tena eşkenî ardê xo ra wayîr bivejî.”
