Verfekê Durzîyan ê Siwêdaye eşkera kerd ke hêzanê hukmatê demkî hewl da ke bi dronekê ey hedef bigîrê û da zanayene ke waştişê şarê Siwêdaye asayîş û rayberîyêka nêmerkezî ya.
13ê Temmuze de hêzanê hukmatê demkî û çekdaranê girêdayeyanê ci vera Siwêdaye dest bi hêrişî kerd. Netîceyê hêrişan de hezar û 300 kesan ra zêdeyêrî ameyî kiştene. Şervananê herêman ê Siwêdaye zî verpersê hêrişan da û şerê giranî qewimîyayî. Tewr peynî de bi mîyanbeynkarîya hêzanê mîyanneteweyîyan adirbes ame îlankerdene, la wext bi wext adirbes yeno binpaykerdene.
Derheqê hêrişan de verfekê Durzîyan ê Siwêdaye şêx Merwan Rizqî qisey kerd.
Şêx Merwan Rizqî da zanayene ke ey wextê şeran de qerardarîya ciwanan a seba pawitişê Siwêdaye heta kêlîya peyêne xurt kerda û va ke ê hêdî hêdî dewa Mezraa ra xo ant, la seba hêrişanê giran yê serê xo ra mecbûr mendî ke reyna dewa Welxaye ra zî xo biancê.
Rizqî îzeh bi naye kerd ke bi dronekê hewl dayo ke ey bikişê û va: “Leteyêk hetê raştî yê sereyê mi de kewt û ez birîndar bîya û mi berdê nêweşxane, birîn mi rê zaf zerar nêda.”
Rizqî dewamê qisey xo de eşkera kerd ke Hêzê Asayîşê Pêroyî û Wezaretê Pawitişî dronekan şuxulnenê û no zî îsbat keno ke bi destê hukmatî hêriş û qirkerdişan yeno kerdene.
Şêx Merwan Rizqî bal ant serê rewşa Nêweşxaneyê Siwêdaye zî û eşkera kerd ke seba hûmara zaf a şehîd û birîndaran, keda xebatkaran bes nêkena û va: “Badê ke birîna mi weş bîye, ez agêraya cîran û merdimanê xo ser û mi paştî daye înan. Mi dî ke hîna zî xover danê.”
Rizqî destnîşan kerd ke hêzanê hêrişkaran hewl dayo ke bi hezaran kes, tank û panzeran bivîyarnê şaristanî û tay beşanê şaristanî de wêranî, talan û sûcî vera sîvîlan kerdî.
Verfekê durzîyan veng da hêzanê mîyanneteweyîyan ke “kiştoxan” herême ra bivejê û va: “Serekê hukmatê demkî yê Sûrîye Ehmed El Şara seba rayberdişê welatî bes nîyo. Mogolê serdemî verê ke peravê Sûrîye de qirkerdişî kerdî. Şara zî sey mogolan gef Siwêdaye rê wend û dima ra gefê xo yê kiştiş, qirkerdiş û talankerdişê milkî ardî ca. Dewa Seilaye ya Siwêdaye ameya wêrankerdene, şêxê aye ameyî kiştene, şarê aye û yê dewanê bînan ameyî koçberkerdene. Komê hêrişkerî adirbesî binpay kenê, coka ê zî mecbûr ê ke pawitişê xo bikerê. Waştişê şarê Siwêdaye; asayîş, aramî û hetkarîya lezûbezî, cuyêka pîyabîyayîşî yê welatêkê laîkî de ke heqanê heme hetan bipawa, rêveberîya nêmerkezî ke şarê Siwêdaye bi xo kar û gureyê xo birêve bero. Êdî bawerîya şarî bi hukmatê ravêrtekî nêna.”
