Pawitoxê heqanê merdiman derheqê hêrişanê aşma temmuze yê ke Siwêda de yenê kerdene ke zafaneyê înan Durzîyan ra yeno pê, waştişê cipersayîşê xoser kerd.
Waştiş dimayê dîmenanê înfazkerdişê kedkarêkê weşîye yê zerrîwaz ê hetê hêzan3e hukmatê demkî ra pey ame kerdene.
Şer û pirodayîşê ke 13ê temmuze de mabênê durzî û eşîranê bedewîyan de ke hukmatê demkî yê Şamî paştî dano înan, dest pêkerd, dima ke rayberîya Şamî leşkerî erşawitişê qade, şer bi qirkerdiş.
Şer û pirodayîşan de nêzdîyê 1400 kesî ameyê kiştene ke zafaneyê înan durzîyê sîvîlî bîyê. Yeno texmînkerdene ke bîlançoyê rastîn giranêr o.
Şahidan, grûbê durzî û Merkezê Çimdarîya Heqanê Merdiman ê Sûrîya (SOHR) paştîdayîşê eşîranê bedewî yê hetê hukmatê demkî reyde û înfazê vera komelê durzîyan ê hukmatê demkî yê Şamî binpaykerdişê heqan ê giran sucdar kerd.
Dîmenanê kameraya ewleyî ya çapemenîya herême ya Siwêda 24î de yenı vînayene le 163e temmuze nêweşxaneyê sereke yê Siwêda de grûbêka kedkarê weşîye erd de yê. Mabênê keso ke unîformaya Wezaretê Zereyî ey ser o ya û kedkarêkê weşîye yê zerrîwaz de nîqaşêk asena. Dima leşkero ke unîformaya leşkerî ey ser o ya, kedkarê weşîye ser o guleyan varneno û cenezaya ey a ke gonî mîyan de menda, erdî ra yena kaşkerdene.
SOHR’î dîmenê sey “înfazo ecêb ke hetê hêzanê girêdayeyê wezaretanê Pawitiş û Karanê Zereyî ra ameyo kerdene” pênase kerd û waşt ke komîsyonêko xoser yê mîyanneteweyî, bêhetî û xoser bêro awankerdene.
