Şarê Wareyê Mexmûrî serra 30. ya penabertîya xo de serra 2024î de di rey hetê teyarayanê dewleta Tirke ra ameyî bombekerdiş û 3 cinî birîndar bîyî. Dorpêça PDK’yî serra 4. de dewam kena û dekewena serra 5.
Şarê Mexmûrî emser bi çalakîyanê cîya-cîyayan hemverê tecrîdê Ocalanî de, hemverê çekanê kîmyayîyan, hêrîş, komkiştişan, tepîştiş û qedexeyişanê şarê kurdî vera vejîya û protesto kerd. Çalakîya Nobetî serra dîyine de zî dewam kena. Roşanê neteweyî, dînî û roşanê têkoşînê azadîya şarê kurdî yê ke mîyanê serre de bîy, ameyî pîrozkerdiş. Reyna bi desan şehîdê Tevgêra Azadîya Kurdî bi merasîmanê pîlan ameyî vîrardene.
Wareyê Mexmûrî di rey ame bombekerdiş
Serra vîyarte bi hawayêko resmî HPG’yî hêzê xo wareyî ra ant la reyna zî serra 2024î de dewleta Tirke di rey wareyê Mexmûrî bombardûman kerd. Bomberdûmanê yewinî de 3 dayîkî birîndar bîyî, bomberdûmanê dîyinî de zî zerarê maddî bîyî. Teyarayê çekinî û bêmerdimî yê dewleta Tirke pêroyê serrre wareyî ser o gêrayî.
Çalakîya Nobetî serra dîyine de dewam kena
Çalakîya Nobetî ke seba azadîya fîzîkî ya Rêber Ocalanî 20ê temmuze 2023î de dest pêkerdo, emser zî bi beşdarîya şarê wareyî serra yewine qedêna û serra dîyine de zî bi qerardarîyêka hîna xurte dewam kena. Reyna Çalakîya Nobetî ra teber Wareyê Mexmûrî de çalakîyê bînî ke seba piştgirîya ‘Ocalanî rê Azadî, Kurdistanî rê Çareyê Sîyasî’ virazîyayî. Komplo, qedexeyê pêvînayîşî û cezayê ke ser Ocalanî de yê, nê pêro hetê şarê wareyî ra ameyî protestokerdiş.
Şarê Mexmûrî serra 2024î zî dorpêça PDK’yî de vîyarna
Ambargo û dorpêça ke bi fermanê dewleta Tirke hetê PDK’yî ra 17ê temmuze 2019î ra nat Mexmûrî ser o ya, serra 4. de û dekewtişê serra 5. de zî dewam kenê. Hemverê nê hêrîş, ambargo, dorpêç û qedexeyan vera tecrîdê giranî yê Abdullah Ocalanî ser o, vera komployê mîyanneteweyî, hêrîş, komkiştiş, dagirkerî, tepiştiş, çekê kîmyewî yê vera Gerîlayanê Azadîye, şîddeta vera cinîyan û tayînkerdişê qeyyûman bi desan rayîrşîyayîş û çalakîyê pîlî hetê şarê wareyî ra ameyî viraştiş.
Şarê Mexmûrî roşanê têkoşînî, neteweyî û dînî bi coş pîroz kerdî
Şarê Wareyê Mexmûrî heme serre de xoverdayîşê Gerîlayanê Azadî, roşanê neteweyî, dînî û rojê taybetî yê Têkoşîna Azadîya Şarê Kurdî, badê 3 serran zêdeyêr pêvînayîşê Ocalanî û girewtişê xeberanê tendurustîya ey bi şahîyanê pîlan pîroz kerd.
Kongre, konferans, weçînayîş, dewreyê perwerdeyî, semîner, panel û sempozyûm
Reyna sazîyê wareyî yê ke girêdayeyê Meclîsê Şarî yê Demokratîkî yê Wareyê Mexmûrî yê, serra 2024î de semînerî, dewreyê perwerdeyî yê pêroyî û xususî, sempozyûmê ke eleqedarê mijaranê cîya-cîyayan ê û seba zaf beşanê komelî organîze kerdî. Serre de Konferansê Jîneolojî yo 1. yê Mexmûrî virazîya. Reyna serre de Kongreya Meclîsê Şarî yo 3. yê Demokratîkî yê Wareyê Mexmûrî ame viraştiş. Şarê Mexmûrî hemserekê meclîsî, hemserekê dîwanê meclîsî, endamê îdareyî û meclîsê xo weçîna. Reyna şarê wareyî seba weçînayîşê hemserekanê neweyan û endamanê Meclîsê Şaredarîya Wareyê Mexmûrî şî sindoqan ser o.
