Endamê DEM Partî yê ke komîsyono ke Meclîs de ameyo awankerdene, ey de ca gênê, vat: “Do komîsyon sazgehê ke ameyê dîyarkerdene, înan bigoşdaro. Dima ra zî do komîsyon derheqê sererastkerdişanê yasayî ke entegrasyono demokratîk zî tede yo, xebatan bikero.”
Endamê DEM Partî yê ke “Komîsyonê Demokrasî, Wayûbirayî û Paştdayîşê Neteweyî” ca gênê, eşkerayîyêka nuştekî daye. Eşkerayîya bi îmzaya Gulîstan Kiliç Koçyîgît, Meral Daniş Beştaş, Hakki Saruhan Oluç, Celal Firat û Cengîz Çîçek de derheqê amanc û şeklê rayberdişê komîsyonî agahî ameyê parekerdene.
Eşkerayî de ame dîyarkerdene ke komîsyon seba çareserîya aştîyane û demokratîk a meseleyê kurdî, seba caardişê rolê tarîxî yê meclîsî nê karî baş bierjno.
Dewamê eşkerayî de wina ame vatene: “Nîqaş û erjnayîşê ke ameyê kerdene, înan ra ma eşkenê vajê ke komîsyon bi ewnîyayîşêko ke hessasîyetê heme beşanê komelî gêno çiman ver, karanê xo domneno. Partîyê ke endam dayê komîsyonî bi berpirsîyarîyêka tarîxî ya seba afernayîşê zerrîwazîya komelî reyde rî bi rî yê. Aştîya komelî bi ê çîyî girêdaye ya ke gamê ke do bêrê eştene ganî her kesî verar bikerê û cewab bido lazimtîyanê prosesî.
‘Hewtêna do sazgehî bêrê goşdarîkerdene’
Do hewtêna rojanê sêşeme û çarşeme de kesayet û sazgehê hewza hemkarîya partîyanê ke endam dayê komîsyonî, ê bêrê goşdarîkerdene. Her kesê ke şer de merdimanê înan cuya xo vîndî kerda, mexdûr bîyê û tesîrêko negatîf înan ser o bîyo, do komîsyon de bêrê goşdarîkerdene. Reyna girewtişê ewnîyayîş û pêşnîyazê derûdorê huqûqî û akademîk ê ke zemînê sîyasî û huqûqî ya seba çareserîya westayî ser o yê, do karê komîsyonî asanêr bikerê.
Entegrasyono demokratîk û sererastkerdişê qanûnî
Goşdarîkerdişî ra pey komîsyon do çarçewaya karanê ke seba prosesî bêrê kerdene û entegrasyono demokratîk de sererastkerdişanê qanûnîyan ser o bixebitîyo. Xeylê muhîm o ke pêşnîyazê sererastkerdişê qanûnî yê seba demokratîkbîyayîş û prosesî bêrê erjnayene û bi nîqaşêka hîra bêrê encamkerdene. Hêzê aştîya komelkî û sîyasetê demokratîkî tena bi nê hewayî eşkeno bêro ca.”
