Ayfer Tîmurlenke ke awankerdişê Dem-Sir Aş û Keyeyê Kulturî yê komunalî yê Dêrsimî de ca girewt, va: “Ez hêvî kena ke no bibo yew destpêk û ma bieşkerê ruhê cuyê komunalî newe ra awan bikerê. No ca do bibo cayê xebatanê ziwanî û kulturî zî”
Dêrsim de ke bawerîya Rêya Heqî tede ganî ya, dewîjanê dewanê Xêçî û Çîlgayî seba ke kehenşopîyanê xo newe ra ganî bikerê û bipawê, vera kapîtalîzmî yew merkezê kulturî yo komunal awan kerd.
Ayfer Tîmurlenk ke awankerdişê Dem-Sir Aş û Keyeyê Kulturî de ca girewt, da zanayîş ke merkez do seba pawitişê bawerîya Rêya Heqî, fealîyetanê ziwanê dayîke û mîrasê kulturî bixebitîyo.
Ayfer Tîmurlenk ard ziwan ke xeylêk cemxaneyî bawerîya raştikêne ra dûrî yê û wina behsê armancê Dem-Sir Aş û Keyeyê Kulturî ke înan akerdo kerd: “Seba şîn û veyveyanê ma cayêkê ma çinêbî. Demo ke yew cenazaya ma bibîyêne, nê rîtuelî keye de ameyêne kerdêne. Meymanî keye de ameyêne hewînayene, cîranan keyeyanê xo de werd viraştêne û ardêne. Nika çîyêko winayên çin o. Çimkî tay merdimê ma ameyî sirgunkerdêne. Naye ra dewamê nê kehenşopîyan zî vindî bi. Koç û sirgunan ra domanê ma zî no kultur xo vîra kerd. Ma pîya no ca viraşt. Ma bi usulê imeceyî çîyêko winayên viraşt. Tenî bi hetkarîya elewîyanê Dêrsimî nê, ma bi hetkarîya xeylêk merdimanê cayanê cîyayan ra no çî viraşt.”
Ruhê komunalî
Ayfer Tîmurlenk wina domna: “No ca do bibo cayê xebatanê ziwanî û kulturî zî. Ma do bi xebatanê kulturî ziwanê xo yo ke vindî bîyo newe ra ganî bikerê. Domanê ma seba ke welatanê cîyayan de ameyê dinya û bîyê pîl, ziwanê xo xo vîra kerdo. Ma hêvîdar ê ke no seba pîrozkerdişê ruhê komunalî bibo yew destpêk. Ma wazenê o ruhê komunalî yê verênî newe ra ganî bikerê.”
Ayfer Tîmurlenke bale ant sere avzelîya yewîye û wina qedîna: “Yewîye, yew fealîyeto ruhî yo weş o. Gerek ma bawerîya Rêya Heqî, ziwanê dayîke û kulturê xo domananê xo rê bimûsnê. Ma nê erdnîgarî de zaf dejî antî û bedelî dayî, la ma qet sereyê xo nêard war. Nê erdnîgarî de loqmeyo ke pîlanê ma dayo ma, helal o. Coka gerek ma zî na rayîre dewam bikerê.”
