Dezgeh û rêxistinanê elewîyan pare kerd ke “Mamekî-Fest” o ke hetê qeyûmî ra mabênê 15-16-17ê tebaxe de do bêro kerdene xîretêkê asîmîlasyonî yo û hetê komelê Dêrsimî ra nêno qebulkerdene.
Federasyonê Elewîyanê Demokratîkan (FEDA), Federasyonê Yewîya Dêrsimî ya Demokratîke ya Ewropa (ADEF) û Kongreya Înşa ya Dêrsimî (DÎK) bi eşkerayîyêka hempare da zanayene ke “Mamekî-Fest” o ke hetê qeyûmî ra mabênê 15-16-17ê tebaxe de do bêro kerdene xîretêkê asîmîlasyonî yo û hetê komelê Dêrsimî ra nêno qebulkerdene.
Dezgehan venga pêro şar, hunermend, nuştox û rêxistinanê demokratîkan ê dêrsimijan da ke na ‘festîvale’ teşhîr û protesto bikerê. Eşkerayîye de dîya zanayene ke dewleta ke tim xîret kena ke Festîvala Munzurî asteng bikera, bi Mamekî-Festî ‘festîvala xo’ ferz kena.
Eşkerayîye de ame îfadekerdene ke şarê Dêrsimî yo ke vano “Destê xo medê ziwan, bawerî û xozaya mi ro” Munzur de tena şayîye nêvirazeno; xo verdano û Munzurî paweno. Eşkerayîye de venga şarî dîya ke wa wayîrê tarîx, bawerî û xoverdayîşê xo vejîyo û vera kerdişanê bazirganîye yê sey Mamekî-Festî tewir bigêro.
Eşkerayîye de wina ame vatene: “Munzur do heta peynî azad biherîko! Festîvala Kultur û Xozaya Munzurî do tim nê erdî de est biba.”
