Prof. Dr. Şukru Aslano ke elewîyan û elewîtîye ser o xebatan keno, derheqê Prosesê Haştîye û Komelê Demokratîkî û pawitişanê elewîyan de ajansê ma rê qisey kerd.
Aslanî pare kerd ke Tirkîya de meseleya her nasnameyî est a û vat: “Sey akademîsyenêkê elewîyî ez eşkena çimdarîyanê xo ser o qisey bikera. Welat de tena meseleya kurdan yan zî meseleya elewîyan çin a. Meseleya nasnameyan est a. Osmanîyan ra nata dewlete kena ke misilmanîye ra ber nasnameyanê bînan tasfîye bikera.
Xora Tirkîya de seba çareserîye roşnîye est a. Tirkîya ganî nasnameyanê xo de pêbikera û pêro nasnameyan qebul bikera. Nika prosesî ra semed mîyanê şaran de hêvîyêke virazîyaya. No proses firsendêko pîl o. Seba ke proses bi hawayêkê pozîtîfî netîce bido ganî her kes xîret bikero.”
Aslanî ard ziwan ke elewîyî eksê texmînan wayîrê rêxistinîyêka pîle nîyê û vat: “Wexto ke ma babeta elewîyan ser o qisey kenê ganî ma bizanê ke elewîyî wayîrê taybetmendîyan ê. Çekê elewîyan çin ê ke bivêşînê, dişmenê înan çin o, rêxistinîya înan a pîle çin a, komelê înan qij o. Warê elewîyan ê qijî est ê ke tede cem kenê. Elewîyî tena cuya azade wazenê, mîyanê komelî de bi azadî têbigêrê. Ez hêvî kena ke no proses seba elewîyan zî do pozîtîf bibo.”
