Xanim Erole û keyeyê xo se ke wisar yeno verê xo danê Warê Koyê Kalan. Çike heybanan kenê weye û heybanî zî koyan ra hesnêkenê. Qesîkerdişê aye nîşan dano ke sereyê aye caran derd û kulan ra durî nêkewto û no semed ra zî wazena vatena xo bireso cayê.
Koyê Kalan nêzdîyê Jiyara Ana Buyere de mîyanê sînorê Dewa Aşkirekeka (Kocatepe) giredeyîyê Pilemorî ye de ro. Beno wisarnan dewê dorman verê xo danê Waranê Koyê Kalan. Nînan ra yewe zî Hanim Erol a. Keyeyê aye û birayê aye heta di aşmî nayera ver xo rê karê xo de bîyê. Rojê eskeran eşto ra ser. Aye ra dime dinya xo vera xirabîye vurîna.
Hanim Erole seke vana di aşmî nayera ver rojê eskerî pê hîrê helîqopteran yenê kunê mîyanê waran. Çike mahkemeyî birayê aye rê ceza birna. Her ca verdanê werê. Bado zî birayê aye destbendkenê û benê erzenê hepis. Îda hepiskerdene zî 10 serrî nayera ver gerîlayanê serê koyî rê yardim kerdişo non dayîş o. Birayê xo neweşo, heto yew ra astimê xo est o, heto bîn ra zî qelbê ey de pîle esta û serranê xo ra zî şenik nîyo hewtay serre yo.
Birayê mi girewt berd eşt hepis
Aye ra Xanim Erole zaf xemgîna seba birayê xo wina vana: “Birayê mi ra vanê to des serrî nayera ver non do domananê koyî. Domanî ke amêne perunan non dêne ci kamî nêdo ci. Kamî gere kerdo nezana, teyna ameyî ma ser. Birayê mi girewt berd eşt hepis.”
Gereyê Xanime zî ameyo kerdiş. Eskeran vato “To 2014î de 43 kîloyî ron do înanê koyî.” Vana mi cira va “2014î de 15 malê mi bî. 15 tenan ra se 43 kîloyî ron vejîno. Çi borî çi bidî inan.”
Vanê ‘domanê şima vejîyê ko’
Xanim Erole vajîna vana “Aîla ma girewta qarşîyê xo. Çike vanê ‘domanê şima vejîyê ko.’ Vejîyê vejîyê ma se bikim. Vejîyayî ko amey kiştene. Nika dawa çi kenê.”
A zî zê cinîyanê Kurdan î bîna çi bêro ser bêro reyna zî wazena haştîye bêro. Vana “Apo û Tayyîp Erdoganê hayê yenê tehet ama tawa bariş nêno. Ma wazenîme endî bariş bêro. Hetê ra vanê haştîye hetê ra zî yenê ma benê kenê hepis. Sucê birayê mi çiko benê kenê hepis.”
