Teorîsyenê fransayîjî Nils Anderssonî vat: ‘’Fikrê Ocalanî û tecrubeyê Rojawanî seba ameyoxê merdimatîye mîsalê girîng ê.’’
Teorîsyenê fransayîjî, edîtor û nuştox Nils Anderssonî derheqê Prosesê Aştîye û Komelê Demokratîkî de ajansê ANF’î rê qisey kerd.
Anderssonî da zanayene ke Rayberê Şarê Kurdî Abdullah Ocalan ke bi serran o zîndan de yo qetî têkoşînî ra fek vera nêdayo û wina dewam kerd: ‘’Serranê 70-80an de sey pêro serkêşanê şarî Ocalanî zî têkoşîno çekdarî dabi destpêkerdene. Na aste de hinî Abdullah Ocalan gêreno çareserîya meseleya kurdan, zemînê sîyasîyî. Na rewşa dinye de ke her ca de alozîye est a, nêzdîbîyayîşê Ocalanî cayê hûrmetî yo. Meseleya kurdan tena meseleyêka kurdan nîya; meseleyêka mîyanneteweyî ya. Ocalanî nê wextî de waşt ke nasnameyê kurdan û estbîyayîşê kurdan bêrê qebulkerdene. Pêşnîyaz û waştişê Ocalanî edîl ê û goreyê rewşa sîyasîye û wextê nikayênî yê.’’
Anderssonî bale ante Komîsyonê Meclîsî ser û vat: ‘’Ronîyayîşê nê komîsyonî eşkera keno ke armanc aştîye yo. Binê sîwana Meclîsî de ronîyayîşê komîsyonêkê winayênî averşîyayîşêko girîng o. Ganî her kes paştî bido nê prosesî. Zaf girîng o waro mîyanneteweyî paştî bidê nê prosesî.’’
Anderssonî rexneyê Rayberê Şarê Kurdî Abdullah Ocalan serê Marksîzmî vistî vîrî û vat: ‘’Rexneyê Ocalanî heqdar ê.’’
Anderssonî dîyar kerd ke qewimîyayîşê mîyanê têgêrayîşê azadîye yê kurdan seba sosyalîzmî û komunîzmî averşîyayîşê girîng ê û vat: “Asta kurdanê Sûrîye mîyanê şaran de vurîyaya têkilîya mabênê merdiman. No nêzdîbîyayîş girîng o. Coka tecrubeyê Şorişê Rojawanî, modelê cuya komunale yê Rojawanî girîng ê; çunke cewan danê meseleyanê şaran û komelan.’’
