Sekreterê Pêroyî yê IFJyî Anthony Bellangerî ard ziwan ke rojnamegerî Nazim Daştan û Cihane Bilgin bi hedefgirewtişî ameyî qetilkerdene û veng da ke wa berpirsîyarî bêrê muhakemekerdene
Rojnamegerî Nazim Daştan û Cihane Bilgin Rojawan de hetê droneyê çekdarî yê Dewleta Tirke ra ameyî qetilkerdene. Vera qetilkerdişê nê wird rojnamegeran û hêrişê îşxalî yê Dewleta Tirke yê vera Rojawanî nêrazîbîyayîşî dewam kenê.
Sekreterê Pêroyî yê Federasyonê Rojnamegeranê Mîyanneteweyîyî (IFJ) yo ke 600 hezar endamê ci est ê, Anthony Bellangerî derheqê qetilkerdişê rojnamegeran de ANFyî rê erjnayîşî kerdî.
Anthony Bellangerî ard ziwa ke ê sey federasyonî bi qetilkerdişê rojnamegeran Nazim Daştan û Cihane Bilgin matmayî bîyî û nê vatî: ”Ez her çî ra ver hemmeslekanê xo yad kena û keyeyanê înan û heme rojnamegerê ke herême de xebityenê înan rê serweşîye wazena. Seba ke nê wird embazê ma yê ke sey rojnamegeran xebityayêne hetê droneyê çekdarî yê Tirkan ra ameyî qetilkerdene ez mîyanê matmayî de ya.
Ma sey Federasyonê Mîyanneteweyîyî nê hêrişê vera hemmeslekanê xo şermezar kenê û wazenê ke wa hêrişkaran ra hesab bêro persayene. Ganî îdareyo newe yê Sûrîye derheqê nê cîyanetî de dehqîqet bido destpêkerdene û kerdoxan mehkûm bikero. Nê wird hemmeslekanê ma yê erjîyayeyan têna Rojawanî ra serebûtê şîdetî teqîpkerdêne û wezîfeyê xo yê medya ardêne ca.
Ma sey federasyonî qebul nêkenê ke qetilkarê rojnamegeran bêceza bimanê. Heqê keyeyanê nê wird embazanê ma est o ke raştîye bizanê. Sey ÎFJyî wezîfeyê ma yo zî ma edaletî bîyarê ca. Ma do semedê nê têkoşîn bikerê. Eke Tirkîya ya zî Sûrîye tehqîqet medo destpêkerdene no yeno manaya binpaykerdişê huqûqê mîyanneteweyîyî. Ma do keyeyanê hemmeslekanê xo têna meverdê û semedê caardişê edaletî xîret bikerê.”
