Hemserekê Pêroyî yê ÎHD’yî Huseyîn Kuçukbalaban ke Komîsyonê Meclîsî de qisey kerdbi, îfade kerd ke xeylê kemaneyê komîsyonî est ê û vat: “Ganî komîsyon bi lez Abdullah Ocalan reyde pêvînayîş bikera.”
Aşmêk ra ver Meclîsê Gird ê Tirkîya (TBMM) de çarçewaya prosesê Aştî û Komelê Demokratîkî de Komîsyonê Demokrasî, Waûbirayî û Piştîdayîşê Mîllî ame awankerdene. Komîsyon bi beşdarbîyayîşê 51 endamanê partîyanê sîyas3i xebatanê xo domneno. Tewr peyên kombîyayîşo 5. ê komîsyonî ame kerdene. Hemserekê Pêroyî yê Komela Heqanê Merdiman (ÎHD) Huseyîn Kuçukbalaban ke kombîyayîşê 5. de qisey kerdbi û pêşnîyazê xo îfade kerdbî, derheqê awanbîyayîşê komîsyon û kemaneyê ke est ê ajansê ma rê qisey kerd.
Huseyîn Kuçukbalabanî ard vîr ke proses vengdayîşê Rayberê Şarê Kurdî Abdullah Ocalanî ra pey vîyarto merheleyêka bîne û ganî nê semedî ra komîsyon Abdullah Ocalan reyde pêvînayîş bikero. Huseyîn Kuçukbalabanî dîyar kerd ke komîsyon ganî biameyêne awankerdene û wina domna: “Vengdayîşê birêz Abdullah Ocalanî ra pey PKK’yî xo fesih kerd û dima ra zî merasîmê veşnayîşê çekan organîze kerd. Sey ÎHD ez û çend embazê ma yê komele zî beşdarê merasîmî bîyê. Envantarê ke ameybî veşnayene zî ma zî tede, dayê 3 heb sazîyan. Dima ra zî meclîs de bi beşdarbîyayîşê partîyanê sîyasî yê Tirkîya bi 51 parlamenteran komîsyon awan kerd. Sey ÎHD ma beşdarê kombîyayîşo 5. yê komîsyonî bîyê. Ma zî komîsyon de pêşnîyazê xo îfade kerdî. La komîsyon de kemaneyî est ê. Kemaneyo yewin o yo ke tu qanûnê komîsyonî çin ê. Tena bi qerarê serekê meclîsî ameyo awakerdene. Kemaneyo diyîn zî o yo ke komîsyonî hema zî birêz Abdullah Ocalan reyde pêvînayîş nêkerdo. Rojevê înan de pêvînayîşêko winasîn çin o. Ma nê kemaneyî kombîyayîşê meclîsî de vatî.”
‘Ganî dewlete gaman bierza’
Huseyîn Kuçukbalabanî îfade kerd ke gamenêeştişê dewlete seba prosesî probleman vejeno û nê çîyî vatî: “Birêz Abdullah Ocalan astengîyê vernîya prosesî yew bi yew hewanayê. PKK’yî xo fesih kerd. Grûbêk çekê xo veşnayî û game eşte. La dewlete heta nika tu game nêeşta. Tena gama ke eşta no komîsyon o. La no komîsyon zî xeylê kemaneyê xo est ê. Ganî bi lez Abdullah Ocalan reyde pêvînayîş bikerê. Dîaspora û heme ca de xeylê sîyasetmedar û sazgehê kurdî est ê, ganî înan reyde zî pêvînayîşan bikero. Yan zî ganî grûbêka ke çekê xo veşnayî, komîsyon înan reyde pêvînayîş biko û ewnîyayîşanê înan bigîro. Seba ke xeylê endamê PKK’yî est ê. Ê zî do çekan ronê. Seba ke ê çekan ronê zî ganî hetê huqûqî ra sererastkerdişî bibê. Gelo ê ke çekê xo veşnayî do senî bêrê Tirkîya? Do senî beşdarê sîyaseto demokratîl bibê? Nê derbarî de tu temînatêk nêameyo dayene.”
