Sîyasetmedarê kurdî Seydî Firatî va: “Azadîya Rayber Apoyî esasanê bingeyînan ê çareserîya demokratîke ya meseleya kurdan ra yew a, eynî wextî de samîmîyetê dewlete zî tîya ra çew eşkeno bivîno.”
Sîyasetmedarê kurdî Seydî Firatî ke ANF’yî rê qisey kerd, ard ziwan ke Tirkîya hema berpirsîyarîyê xo yê mîyanneteweyîyî nêardî ca û tecrîd hema dewam keno û va kurdî û rayapêroyîye wazena Rayberê Şarê Kurdî Abdullah Ocalano cade bibo azad.
Seydî Firatî vist vîrî ke dewleta tirke pêkerdişê mîyanneteweyîyî îmza kerdî û nê pêkerdişan ra berpirsîyarîyê ci est ê û nê vatî: “Seba ke Tirkîya pêkerdişê mîyanneteweyîyî îmza kerdî mecbur a ke nînan bîyaro ca. Caardişê nê wezîfeyê Tirkîya yo. La Tirkîya naye ra remena. Na bêhuqûqîye ya. Pêkerdişê ke îmza kerdî nêvînayîşî ra yena. No nizdîbîyayîş raşt nîyo. Polîtîkayê tecrîdî ke yenê caardene vera tepişteyanê kurdan û Rayber Apoyî xespkerdişê heqan o. Heqê înan yenê binpaykerdene.No îşkenceyo ke bîno o. Huqûq yeno binpaykerdene.”
Seydî Firatî vat: “Rixmo ke Konseya Ewropa wext dayo Tirkîya hema zî gamêka pêt nêameya eştene. Gerek vera Tirkîya tewiro dahîna zelal û xurt bêro girewtene. Azadîya Rayber Apoyî esasanê bingeyînan ê çareserîya demokratîke ya meseleya kurdan ra yew a, eynî wextî de samîmîyetê dewlete zî tîya ra çew eşkeno bivînê. Têna wedaritişê tecrîdî qîm nêkeno, gerek Rayber Apo bibo azad.”
Firatî çalakîyê ke do 15ê êlule de verê Konseya Ewropa de bêrê destpêkerdene vistî vîrî û va nobeta Strasbourgî zî do bi tewrbîyayîşanê qirseyî bêro xurtkerdene. Firatî bale ante tewrbîyayîşanê ke do xeylê welatanê Ewropa ra bêrê kerdene ser û wina veng da: “Tewrbîyayîş çend xurt bo wina tesîrê ci zî xurt beno. Nê wextê krîtîkî de çalakîyî zaf muhîm ê. Gerek şarê ma, hêzê şorişgêr û demokratîkî, rêxistinê komelê sîvîlî û roşnvîrî vengê xo berz bikerê ke Ewropa şiro Tirkîya ser û tewiro zelal ramojno.”
