Şaredarîya Amedî ya Şaristanê Girdî beşanê cîya-cîyayan de kursî akerdî. Sporî ra heta hunerî, perwerdeyî ra heta averşîyayîşê şexsî bi hezaran hemwelatîyan tira îstîfade kerd.
Şaredarîya Amedî ya Şaristanê Girdî bi fehmê şaredarîya beşdare seba ciwan, cinî, astengdar û gedeyan tewir-tewir xebatî kerdî ke xo biresno cuya şarî ya sosyale.
Cinîyan rê
11 programê cîya-cîyayî de 1089 cinî beşdar bîyî. Tewr zaf beşdarî kursê asnawe (246), atolyeya tekstîlî (223) û kursê sporî (150) de bîye.
Astengdaran rê
Serekîya Xizmetanê Astengdar û Pîran xo resnaye 1005 kesan. Nê kursan de astengdarê zehnî (354), otîstîk (277) û ortopedîk (165) tewr zaf beşdarîye mojnaye.
Gedeyan rê
750 gedeyî beşdarê 11 atolyeyan de bîyî. Resim, tîyatro, muzîk, kayê aqilî, îngilizkî, kompûter, kişike, viraştişê hacetanê darênan, kurdkî û boyaxkerdişê darênan.
Ciwanan rê
Wendegehê Sporî yê Hamnanî de 5850 gede û ciwanî kursê sporî girewtî. Tewr zaf beşdarî asnawe (2100), futbol (1100) û voleybol (450) de bîye. 65 wendekaran zî seba azmûnanê BESYO’yî hazir bîyî.
Kultur û Huner
318 kesan kursê muzîk û hunerî girewtî. Tenbur (60), gîtar (50), kurdkî (100), keman (36).
Bi nê kursan hemwelatîyî marifetê meslekî musayî, astengdarî aktîfêr bîyî, gedeyî kultur û ziwanan de aver şîyî, ciwanî zî bi perwerdeyê sporî û teknolojîye ameyoxî rê hazir benê.
