Platformê Yewîya Cinîyan ê Kurdan ê Vakurî bi munasebetê 1ê Êlule Roja Aştî ya Dinya eşkerayîyêk weşanaye û bni munasebetê roje vengdayîşê yewîye kerd.
Platformê Yewîya Cinîyan ê Kurdan ê Vakurî bi munasebetê 1ê Êlule Roja Aştî ya Dinya eşkerayîyêka nuştekî pare kerd. Platformê Cinîyan mesajê xo de bale ant yewîya şarê kurd û têkoşînê aştî ser o.
Eşkerayîya Platformî wina ya:
“1ê Êlule Roja Aştî ya Dinya seba ma cinîyanê Kurdan tena sembolêk nîyo, eynê wextî seba awankerdişê dinyayêka azade, seypê û bê tehakkum vengdayîşêk o. Aştî tena bêvengîya çekan nîya; aştî lazimtîya însanî ya ke tede her kes bi nasname, ziwan û kulturê xo bi hewayêko azad biciwîyo, cinî her qada cuye de wayîrê veng û hêz biba.
Ma cinîyê kurdî bi tarîxê xo yê têkoşînî, baş zanê ke aştî bêyê edalet mumkin nîya. Nê semedî ra ma veng danê heme cinîyan ke vera her tewir zordestî, cîyakerî û şîdetî bi yewîye vinderê. Yewîya ma hêzê ma ya; ma pîya eşkenê komelêko demokratîk awan bikerê ke tede heqê merdiman, seypêyîya zayendî û edaleta komelî bşingeyê cuye bibê. Ma bawer kenê ke zerrîya her cinîyêk seba aştîyêka menda û birûmet dana piro, seba ke cinî bi xo afernayoxê cuye yê û bi têkoşînê xo eşkenê dinya bibedilnê.
Na roja aştî de ma sey Platformê Yewîya Cinîyanê Kurd ê Vakurî heme kesan silaynenê ke ma reyde seba aştîyêka menda, komelêko demokratîk û yewîyêka bi hêz bixebitî. Ma na bawerî de yê vengdayîşê birêz Abdullah Ocalan ê seba aştî û komelo demokratîk do berê dinyayêka azade û aştîyane seba heme şaran askero. Nê semedî ra ma veng danê dewlet û hukmatî ke bi lez gamanê şênberan seba aştî bierzê.
Ma sey cinîyê kurdî 1ê Êluke heme aştîwaştoxan rê pîroz kenê û ma a bawerî de yê ke pîya ma eşkenê şer û nefretî vindarnê. Ma do seba dinyayêka ke tede her kes bi rûmet û azad biciwîyo, gamanê bi cesaretan bierzê. Wa 1ê Êlule biba destpêkê têkoşînêko newe yê seba aştî, seypêyî û yewîye!”
