Dewa Akora yanî Axûra ya Îdirî de Goristanê Armenîyan est o. Goristanê tarîxî ke bi çinbîyayîşî reyde rî bi rî mendo, xeylê kateyê merdiman vejeyê teber. Kateyî paweyê cipersayîş û pawitişî yê!
Dewa Akora yanî Axûra girêdayeyê qezaya Aralikî ya Îdirî ya. Dewe 45 kîlometre merkezê Îdirî ra dûrî ya. Nêzdîyê dewe Goristanê Ahûra ke aîdê Armenîyan o, est o. Goristanêko kehen o. Dewe verê ca û warê Armenîyan bîya. Goristan de xeylê gorê tarîxî est ê. Hendê goran bi motîfanê cîyayan ameyê neqşkerdene.
Goran ser o xaçî est ê
Goristan tam deşta Koyê Araratî (Koyê Agirî) de yo. Dîyar nîyo ke Goristan de çend tirb yan zî gorî est ê. La seba kehenîya goristanî hendê goran ke neqş ser o est ê, vaş girewto. Goran ser o zî xaçê ke sey sembolê xiristîyanî yenê zanayene, est ê.
No goristan verê sey Manastirê Akora yanî Axûra zî yeno zanayene. Goristan bêwayîr û bêkes mendo û çinbîyayîşî reyde rî bi rî mendo.
Kateyê merdiman û goristan paweyê cigêrayîşî yê
Goristan de çîyo balkêş o yo ke kateyê merdiman vejeyê teber. Gorêka ke erdî ra şîya, komêk kateyê merdiman mîyanê di kerreyan de ameyê nimitene. Heta nika kes nê kateyan ser o cipersayîşêk yan zî cigêrayîşêk dayo destpêkerdene dîyar nîyo. Nêyeno zanayene ke kamî nê kateyî kom kerdî û mabênê her di kerreyan de nimitê. Yeno texmînkerdene ke kesê ke şonê goristanî zîyaret kenê yan zî şaneyan nê kateyî kom kerdî û uca nimitêç
Goreyê westayanê Tibê Edlî ke derheqê kateyan de agahî dayê Ajansa Welat; nê kateyî aîdê merdiman ê kateyê pol û hîtê merdiman ê.
Vîdeo û fotografê kateyanê merdiman ê Goristanê armenîyan o tarîxî ke hetê ajansê ma ra ameyê komkerdene, paweyê cigêrayîş û pawitişî yê.
