Girewteyo nêweş Mehmet Emîn Vûral o ke seba dermankerdiş sewqê hepisxaneyê Tîpê R ê Metrîsî ame kerdene, dîyar kerd ke gardîyanî tim danê piro û bi kiştişî ey tehdît kenê.
Girewteyo nêweş Mehmet Emîn Vûral ke nîsana 2025î de Hepisxaneyê Edene yê Tîpê F ra sewqê Hepisxaneyê Tîpê R ê Metrîsî yê Stenbolî ame kerdene, eşkera kerd ke gardîyanî tim danê ey ro û cayê linganê ey riyê îşkence ra helisîyayî. Vûralo ke serra 2016î de bi îdiaya “endamtîya rêxistine” ame girewtene, bi rayîrê telefonî binpaykerdişê heqan ê hepisxaneyî îfade kerdî. Goreyê agahîyanê ke keyeyê ey pare kerdî, Vûral Hepisxaneyê Tîpê R ê Metrîsî de ke seba dermankerdişî sewqê ey ameyo kerdene û bi aşman o nêyeno deremankerdene. Vûral dîyar kerd ke hewteyêk o tena bi sereyê xo yo, werd nêyeno dayene û nê semedî ra kewto grevê vêşanîye. Vûral vat ke ge-ge seba weşîya xo erd ra şono tuwalet û vat ke gardîyanî tim hêrişê ey kenê û vat ke nê semedî ra laşê ey de cayê ke derb girewta helisîyayî.
Hêrişê plankeredeyî
Vûralî pêvînayîşê telefonî de dîyar kerd ke rayedarêkê hepisxaneyî yê bi nameyê Oznûr ameyo qawişê ey û vato, “Tîya kiştişê kurdêkî seba ma zaf asan o. Ma do to bikişê û vajê qeza bîye. Ma verê zî eyn çî tîya de kerdo, derheqê ma de tu cipersayîşî nêameyê akerdene.” Vûralî dîyar kerd ke zilmo ey ser o her ke şono vêş beno û vat ke qawiş de hêrişê gardîyanan reyde rî bi rî mendo, la eke girewteyê bînî paştî nêdayêne do biameyêne kiştene. Vûralî îfade kerd ke hepisxane de hêrişêko plankerde est o û veng da raya pêroyî ke na babete de hesas ba.
