Şewa ke 7ê Êlule 8ê Êlule ra girêdana, girewtişê Aşme yo temam yeno, do 82 deqîqeyî rengê xo biçarno sûr û %85ê nifusê dinya do bieşkero nê hedîseyê asmênî seyr bikero.
Na şewa Yewşeme asmên, bi milyonon merdiman rê do yew şayiya asmênî ya kem-vînaye pêşkêş bikero. Şewa ke 7ê Êlule 8ê Êlule ra girêdana, Aşme do bikewo bine siya Dinya û girewtişê Aşme yo temam do bibo, rengê xo do biçarno sûr û o teswiro ke ci rê “Aşma bigonî” vajiyena, do biyaro meydan.
Teqrîben %85ê nifusê dinya do bieşkero nê girewtişi bivîno. Afrikaya Rojhelat, zafêrê Asya, Australyaya Rojawan û Antarktîkaya Rojhelatî de girewtiş do sere ra heta peynî bêro seyrkerdiş. Ewropa, Afrîkaya Rojawan û heremanê binan ê Australya de ke do yew qismê girewtişi bêro vînayîş. La belê qitaya Amerîka de seba ke girewtiş denkê saetanê sibayî yeno, nîno vînayîş.
Girewtiş pêro pîya do 5,5 saetî biramo û Aşme do 82 deqîqeyî bi temamî siya Dinya de bimano. Seba seyrkerdişi teleskop ya zi verçimkê xususî lazim nîyê; merdim şeno bi çimê zitî zî seyr bikero.
Girewtişê Aşme yo temam çiyo?
Girewtişê Aşme yo temam, wexto ke Roje, Dinya û Aşme tam yew rêze de benê, o wext yeno meydan. Wexto ke Dinya kewena mabênê Roje û Aşme, rîyê Aşme beno sûr. Sebebê nê vuriyayîşê rengî no yo ke, Roje wexto ke atmosferê Dinya ra vêrenê ra, kewe-kesk vila benê, labelê sûr-porteqal resenê Aşme ser.
Girewtişo bin key o?
Girewtişê Aşme yo temam o bin do 2–3ê Adarê 2026ine de bibo. Nê girewtişi do merdimi bieşkerê Amerîkaya Vakur, Adeyanê Pasîfîkî, Australya, Zelandaya Newîye û Asyaya Rojhelatî ra seyr bikerê. Wextê girewtişi yo pêroyî ke do 58 deqîqeyî bibo.
