Polîsan hêrîşê kesan kerd ke şîyî vernîya awanîya CHP’yî ya Stenbolî û înan ra 10 kesî destbend kerdî. Serekê CHP’yî Ozgur Ozelî îfade kerd ke ê do sîyasetê demokratîkî bipawê.
Vera tayînkerdişê qeyûmî yê Gursel Tekînî reaksîyonî dewam kenê. Serekîya Şaristanî ya CHPyî. Ablukaya polîsan û nobetê vernîya awanî dewam kenê. Serê sibayî barîyerê neweyî ameyî ronayene. Mabênê polîs û şarî de pêrodayîş qewimîya. Parlamenterê CHP’yî vat polîsê sîvîlî wazenê bikewê zere, înan ê asteng kerdî.
Polîsan bi gazê bîberî hêrîşê şarî kerd. Yew keso 54 serre yo, rewşa ey xirab bîye. 10 kesî zî ameyî destbendkerdene.
“Ma do sîyasetê demokratîkî bipawê”
Serekê CHP’yî Ozgur Ozelî kombîyayîşê Meclîsê Temsîlkaranê Rêxistine de vat: “Vernîya ma de îqtîdarêko pîr, betilîyaye, eciz est o ke welatî rê çîyêk nêdano. Tirkîya de waştişê Erdoganî û yê şarî yewbînan ra cîya bîyî. Seba ke kursî ra nêwirzîyo, hazir o welat bierzo mîyanê adirî. Ewro seba înan tehdîdo gird CHP yo. Tirkîya de sîyasetê gelekî partîyan binê tehdîdî de yo. Ma do sey cephe sîyasetê demokratîkî bipawê. 19ê adare ra nat 173 rojî yo vera ameyoxê Tirkîya darbe yeno kerdene, ma zî têkoşîn kenê.”
