Endamê MYK û parlamenterê Colemêrgî yê DEM Partî Vezîr Coşkun Parlak dîyar kerd la waştişê Rayberê Şarê Kurdî Abdullah Ocalanî ser o temsîlkarê partîyanê sîyasî yê ESP, SKYP, YSP û SODAPî do reya ewile şêrê Îmrali.
Komîteyê Rayberîya Merkezî (MYK) ya Partîya Têduştî û Demokrasîyî ya Şaran (DEM Partî) kombîyayîşî ra pey eşkera kerd ke do şêrê Rayberê Şarê Kurdî Abdullah Ocalanî reyde pêvînayîş bikerê. Hemserekê Pêroyî yê Partîya Têduştî û Demokrasîyî ya Şaran (DEM Partî) çimdaranê partîyanê sîyasî yê temsîlkarê DEM Partî do Rayberê Şarê Kurdî Abdullah Ocalan reyde Girawa Îmrali de pêvînayîş bikerê. Her çend tarîxî pêvînayîşî hema nêamebo zelalkerdene zî, yeno texmînkerdene ke pêvînayîş do hewtêna bêro kerdene. Hemserekê Pêroyî yê DEM Partî Tulay Hatîmogullari û Tuncer Bakirhan zî do beşdarê pêvînayîşî bibê. Partîyê sîyasî yê ke temsîlkarê DEM Partî yê, wina yê; Partîya Herêman a Demokratîke (DBP), Partîya Sosyalîst a Bindestan (ESP), Partîya Sosyalîste ya Newe ra Awankerdişî (SYKP), Partîya Şorişgirî ya Yewbîyaye (Partîya Şorişgire), Partîya Çep a Keske (YSP) û Platformê Piştîdayîşîyewbînan ê Sosyalîst (SODAP) do hewtêna şêrê Girawa Îmrali û Rayberê Şarê Kurdî Abdullah Ocalan reyde pêvînayîş bikerê.
Endamê MYK û parlamenterê Colemêrgî yê DEM Partî Vezîr Coşkun Parlak derheqê pêvînayîş û tedeyîyanê pêvînayîşî de ajansê ma rê qisey kerd.
‘Rayber Abdullah Ocalanî waşt’
Vezîr Coşkun Parlakî îfade kerd ke reya ewilîn a DEM Partî ra vete temsîlkarê partîyê sîyasî do Abdullah Ocalan reyde pêvînayîş bikerê û wina vat: “Demêko derg o ma qerar dabi ke heyet şêro Îmrali. La riyê kar û xebatan ra biney derg ramit. No waştiş hem ê Rayberê Şarê Kurdî Abdullah Ocalanî bi hem zê ê ma bi. Ma prosesêko tarîxî de yê. Birêz Abdullah Ocalan zî prosesê ser o vatêne xeylê pêşnîyazê mi est ê ke ez temsîlkaranê DEM Partî reyde pare bikera. Waştişê Rayberê Şarê Kurdî Abdullah Ocalanî ser o pêvînayîş yeno kerdene. Xora verfekê nê partîyanê sîyasîyan temsîlkarê DEM Partî yê. Mîyanê MYKya ma de ca gênê. Dima ke endamê MYK’yî şîyê girawe û pêvînayaşî kerd, do qiseykerdiş û pêşnîyazî ke Îmrali de aver şîyê bivînî.”
‘Waştişê ma yo tewr sereke azadîya Rayberê Şarê Kurdî yo’
Vezîr Coşkun Parlakî dîyar kerd ke waştişê înan o tewr sereke azadîya fîzîkî ya Rayberê Şarê Kurdî yo û vat: “Sey DEM Partî Komîsyonê Meclîsî rê çar pêşnîyazê ma est bîyê. Seba girewteyê nêweşî veradîyê, qanûnê înfazî, terorî û qeyûman û caardişê qeraranê AÎHM’î ma pêşnîyaz kerdbî ke nê babetan de gamî bêrê eştene. Van3e wa gerîlayî çekanê xo ronê û bêrê Tirkîya. La wa senî bêrê. Eke bingeyêko qanûnî çin bo ke înan bipawo û beşdarê sîyaseto dmeokratîk bikero do senî bêrê. Entegrasyono demokratîk rojêk de nêbeno. Lazim o şertê birêz Abdullah Ocalanî bêrê başkerdene ke hîna rehet beşdarê prosesî bibo û pêşnîyazanê xo bikero. Prosesî de waştişê ma yo tewr sereke azadîya Rayberê Şarê Kurdî ya.”
Do pêvînayîşî de çi bêro qiseykerdene?
Vezîr Coşkun Parlakî derheqê tedeyîyanê pêvînayîşî de nê çîyî vatî: “DEM Partî projeyê Rayberê Şarê Kurd bîye. Meseleyê Kurdan ke Kurdîstan de aliqnaye mendbi, bi projeyê ey heme Tirkîya rê vila bi. Pêvînayîşî de zî do nê nuqtayan ser o pêşnîyazê Rayberê Şarê Kurdî est bî. Seba DEM Partîn hîna zaf ganî çi bêro kerdene, seba hîrakerdişê sîyaseto demokratîk çi taktîkî lazim ê do nê babetan ser o pêvînayîş bêro kerdene. Rayberîya Xoser a Vakur û Rojhelatê Sûrîye zî goreyê mektubo ke Birêz Abdullah Ocalanî înan rê erşawitbi, têgêrenê. Nê pêvînayîşî de zî îhtîmal o ke rewşa Rojava zî bêra nîqaşkerdene. Do operasyono vera CHP û rewşa sîyasetê demorkatîkî zî bi pêroyî bêra nîqaşkerdene. Ewro ra pey şarê kurd vera Rojhelatê Mîyanênî de senî xo rêxistin bikero, nê babetan ser o do munaqeşeyî bêrê kerdene.”
