Cinîyan bale ant serê qetilkerdişê cinîyan ke her ke şino zêde beno û dîyar kerdî ke çareserî tena sererastkerdişê qanûnanî nîyo, çareserî do bi hişmendîyê komelî û pawitişê cewherî pê bêro. Dîlan Çelîke ya TJA’yî dîyar kerd ke aşma tebaxe de 28 cinî hetê camêrdan ra ameyê qetilkerdiş û va: “Bêcezaveradayîş cesaret dano şikdaran. Ganî qanûnê bi tesîr lezkî pê bêrê.”
Tirkîya û Kurdistan de qetilkerdişê cinîyan û merdişê bişik yê cinîyan her ke şinê zêde benê. Dimayê antişê Pêameyîşê Stenbolî cuya hîn cinîyan tewr zêde kewte tehluke. Cinî her ware de hemverê şîdetê cinîyan ser o pawitişê cewherî aver benê û têkoşîn dewam kenê.
Sevîm Baş û Dîlan Çelîke yê TJA’yî derheqê qetilkerdişê cinîyan û merdişê biguman yê cinîyan de qisey kerdî.
‘Ganî cinî pawitişê cewherî pê bîyarê’
Hemsereka Partîya Têduştî û Demorkasî (DEM partî) ya Artemêtê Wanî Sevîm Baş dîyar kerd ke têkoşînê hemverê qetilkerdişê cinîyan meseleya her kesî ya û Sevîm Baş wina va: “Ganî dewlete fehmê îdareyêk newe esas bigîro. No tena bi sererastkerdişê qanûnî bi polîtîkayê komelî, huqûqî û sazgehê cinîyan mumkin o. Ganî cinî pawitişê cewherî bikerê û semedê nê perwerdeyî şert o. Ganî tewrê perwerdeyî bibê û bibê wayîrê hişmendî. Bi no hawa do bieşkê xo bipawê. Ganî wareyê cuya cinî de merkezê cinîyan zêde bibê. Ganî her merkez û qezayan de nê merkezî bibê.”
‘Beno ke 28 cinîyê ke nêkewtê qeydan zî est ê’
Hemsereka Partîya Herêman ê Demokratîkî (DBP) ya Rêya Armûşî ya Wanî Dîlan Çelîk zî bale ant qetilkerdişê cinîyan ser û va: “Aşma tebaxe de 28 cinî ameyî qetilkerdiş. No tabloyêk bi xof o. Heto ke nêameyo vînayîş est o. Ganî ma nêkerê xo vîr ra. Beno ke 28 cinî nêkewtê ver qeydan zî bibê. O wext tablo hîna zêde bi xof a. Semedo ke no pê nêro, ganî xebatê cidî, kampanya û qanûnî bi tesîr pê bêrê.”
‘Camêrdî sîstemê serdestî ra hêz gênê’
Dîlan Çelîk dîyar kerd ke cezayê semedê şikdaran yenê dayîş tesîrdar nîyê û va: “Camêrdî sîstemê serdestî ra hêz gênê. Camêrdî nê heqî xo de vînenê. Bi cezayanê qijan yenê xelatkerdiş. Hemverê nê de ganî cezaya bitesîr bêro dayîş. Ma hewl danê cinî bibê wayîrê hişmendî. Ma wazenê bi cinîyan bidê hîskerdiş ke ê tena nîyê. Semedê nê têkoşînê ma dewam keno.”
