Konservatuara Aram Tigranî ke qeyûmî 9 serran ra ver girewtbî, reyna dest bi perwerdeyî kena. Qeydanê kursan dest pêkerd û perwerdeyî 27ê teşrîna verêne de dest pêkenê.
Badê weçînayîşanê herêmkîyan, rêçê qeyûman ke bi sîyasetê asîmîlasyonî waştêne warî de ca bigîrê, yew bi yew yenê pakkerdene. Şaredarîyê DEM Partî bi taybetî waranê kultur-huner û cinîyan de xebatanê xo xurt kenê, wazenê xebatanê kultur-hunerî yê bi ziwanê dayîke her warî de vila bibê.
9 serran ra dima reyna beno aktîf
Konservatuara Aram Tigranî ke gelekî hunermendê ciwanan perwerde kerdî, 2016î de qeyûmabê verênan de ameye girewtene. Konservatuare 9 serran ra dima reyna bena aktîf û warê muzîkê gedeyan, tîyatro, edebîyat, resim û sînema de qeydanê kursan dest pêkerd. Badê qeydan, konservatuara 27ê teşrîna verêne de do dest bi perwerdeyî bikero.
“Amancê ma pîl o yo ke ciwanan rê bimojnê ke alternatîf est o”
Tîyatrokar Rezan Kayayî îfade kerd ke konservatuara Aram Tigranî vîrêk awan kerdo û îlawe kerd: “Amancê ma yo tewr pîl o yo ke ciwanan û gedeyanê bajarî rê bimojnê ke ê bêalternatîf nîyê.”
Kayayî vat ke demê qeyûman de seba dewamkerdişê xebatanê kultur-hunerî warê alternatîfî akerdî: “Sazgehê ke ma akerdî de ciwanê ke Aram Tigran û Cegerxwînî de xebitîyayî, tede ca girewt. Nê wendekar û mamosteyî hema zî xebatanê kulturî de dewam kenê.”
“Wendekarê ê demî bîyî mamosta”
Kayayî dîyar kerd ke wendekarê ke ê deman de konservatuara de perwerde dîyêne, nika sey mamosta wendekaranê neweyan perwerde kenê: “Wendekarê ke o ê deman de perwerde dîyêne, nika pêro bîyî mamosta û wendekaranê neweyan perwerde kenê. Ciwanê ke enstruman cenenê û sehne de bi hezaran kesan rê îlham danê, heme Aram Tigranî de pîl bîyî.”
“Warê xebatê ma hîra bî”
Wendekarê tîyatroyî Omer Akkanî va reyna akerdişê Konservatuara Aram Tigranî seba înan bîyo keyfweşîya girde: “Teqrîben 10 serrî şaredarîyanê ma de qeyûm est bî. Demê qeyûman de warê tîyatro, huner, edebîyatî de ma nêeşkayêne xebate bikerê. Cayê ke ma bêrê têhet, xebate bikerê çin bî. Nika akerdişê konservatuara ma ma zaf keyfweş kena.”
Seba qeydan vengdayîş
Akkanî peynî de ciwanan ra va: “Badê ke ma şaredarîyî reyna girewtî, ma eşkenê xebatanê winasîyan bikerê. Eke akademîyêka sey Aram Tigranî yena akerdiş, ganî heme ciwanî û şarê ma piştîya na akademîye de vinderê. Ganî xebatanê ci rê hêz bidê û ci pîl bikerê. Pîlkerdişê na akademîye do qewetêko gird bido kulturê kurdî û ziwanê kurdî.”
