Fîkrî Tugluko ke 1997î de wexto ke wendekarê Unîversîteya Mersînî bî, ameyo tepîştene û cezaya muebetî ci rê ameya dayene, 29 serran ra dima azad bî. Tuglukî pêşwazîya Girêsira de mesajê azadîye da.
Merasîmê pêşwazîkişî de temsîlkarê partîyanê sîyasîyan, rêxistinê komelê sîvîlî, keyeyê Tuglukî û gelek şar beşdar bîyî.
Tuglukî qiseykerdişêko kilm kerd û vat: “Ameyîşê tîyayî, bi şarê xo pîyabîyayîş hîsêko zaf rind o labelê bi hezaran embazê ma zîndan de yê, seba ney zereyê ma de ma kêmanîyêk hîs kenê. Heta ke ma kêmî bibê, ma nêeşkenê azad bibê. Labelê moralê embazanê ma zaf rind o, ma pawenê ke rojêk ê zî azad bibê. Keyfweşîya ma ya raştikêne wexto ke ê zî ameyî, ma do biciwîyê.”
Dima Tugluk şî keyeyê xo yê Taxa Çay, uca bi çepikan, tililî û sloganê “Bijî berxwedana zindanan” ame pêşwazîkerdene.
Fîkrî Tugluk kam o?
Kanûna 1997î de Unîversîteya Mersînî Beşê Muhasebeyî de wendekar bî, o wext ameyo tepîştene. DGMyî de muhakeme bî û cezaya muebetî ci rê ameye cayene. Rêz bi rêze Êlih, Xelat a Bedlîsî, Trabzon û Zîndanê Emnîyetê Berzî Numre 1 ê Dîyarbekirî de mend. 29 serran ra dima tahlîye bî.
