Mehmet Şîrîn Taşdemîro ke Zîndanê Karabukî de yeno tepişnene, tehlîyeya ci raya 5ine ameye peydeeştene. Narey bi bahaneyê binê dêsî rêze de rayra nêşi cezaya dîsîplînî dîyaye ci û no zî bi sebebê tehlîyeya ci.
Tepişteyê ke Zîndanê Karabukî de yê, rixmo ke cezaya înan qedîyaye nînê tehlîyekerdene, înan ra yew zî Mehmet Şîrîn Taşdemîr o. Tehlîyeya Taşdemîrî 3 serrî yo bi hewayêkê sîstematîkî yena astengkerdene. Taşdemîr reya 5ine bi bahaneyêkê bînî nêame tehlîyekerdene. Birayê ci Kadrî Taşdemîrî vat, ”Mîyanê ceza de ceza danê ci.”
Goreyê doneyanê Komeleya Huqûqnasan ê Semedê Azadîye (OHD) zereyê serrêka peyêne de zîndananê Tirkîya de tehlîyeya 4 hezaran ra zafêr kesan ameye peydeeştene. Heyetê Îdare û Çimdarî bi hewayêkê keyfî seba ke tepişteyî poşman nêbîyî tehlîyeya înan peyde erzeno. Ge ge no zî qîm nêkeno bahaneyan vîneno. Awa ke yena xerckerdene, kitabo ke yeno wendene sey bahane yenê şuxulnayene. Badê Zîndanê Boluyî, aşmêke cuwa ver Zîndanê Karabukî de tehlîyeya 12 kesan ameye peydeeştene. Mîyanê nê 12 kesan de Mehmet Şîrîn Taşdemîr zî ca geno ke tehlîyeya ci reya 5ine ameye peydeeştene.
Mehmet Şîrîn Taşdemîr 1993 de ame tepiştene û cezaya muebetî dîyaye ci. Taşdemîro ke 32 serrî yo zîndan de yo, nê demî de xeylê zîndanan de mend. Tewr peynî Karabukî rê ame surgunkerdene. Rixmo ke cezaya ci qedîyaye tehlîyeya ci ameye peydeeştene. Nizdê hîrê serran o sey rehînî yeno tepiştene. Heyetê ke cezaya ci reya 5ine hendê 8 aşman peyde eşte, cezaya dîsîplînî û canêverdayîşê rêxistine sey bahaneyî ramojnayî. Sebebê cezaya dîsîplînî zî o yo ke goştarîye gardîyayan nêkerd, binê dêsî de rêze de rayra nêşi. Avûkatan vera cezaya dîsîplînî îtîraz kerd û dewa kirişte Mehkemeya Heqanê Merdiman a Ewropa.
Birayê Mehmet Şîrîn Taşdemîrî, Kadrî Taşdemîrî hêrsê xo ard ziwan û vat: ”Mîyanê ceza de ceza danê. No îşkence yo. Nê caardişê bêhuqûqîyî ganî bêrê qedînayene. Na neheqîye nîna qebulkerdene. Na rewşe hinî ameye halê sîstematîkî. Têna birayê mi nê ganî pêro tepişteyê bînê ke nê halî de yê bêrê tehlîyekerdene.”
