Veradayîşê Mehmet Salîh Erdenî ke 30 serrî yo hepisxane de yo, reya hîrêyîne ameye dergkerdene. Mehkema qerarê heyetî şaş dî û îtîrazê avûkatan qebul kerd. La rixmê ney zî Komîteya Çimdarî qerarê mehkema binpay kerd û înfazê Erdenî heta 10ê adara 2026î taloq kerd.
Girewteyo sîyasî Mehmet Salîh Erden ke Hepisxaneyê Elezîzî yo Hûmara 1. de maneno, her çend cezaya xo qedênaya zî reya hîrêyîne veradayîşê ey ame taloqkerdene. Mehmet Salîh Erden ke 11ê Çele de cezaya xo temam kerdbî, riyê qeraranê Heyetê Rayberîya Çimdarî û Îdareyê Hepisxaneyî ra nêno veradayene. Her çend mehkema 19ê tebaxe de dergkerdişê înfazî şaş dîbo zî û îtîrazê avûkatan qebul kerdbo zî, Heyetê Rayberîya Çimdarî 10ê êlule de veredayîşê Erdenî 6 aşmî derg kerd yanî heta 10ê adara 2026î taloq kerd. Parlamentera Partîya Têduştî û Demokrasî ya Şaran (DEM Partî) ya Şirnexî Newroz Uysal Aslan derheqê taloqkerdişê veradayîşê Erdenî de Serekîya Komîsyonê Cigêrayîşê Heqanê Merdiman ê Meclîsî zîyaret kerd û seba ke Wezaretê Edaletî cewab bido, pêşnîyazpersî pêşkêş kerdbî.
Her çend pûanê Mehmet Salîh Erdenî 44 bî û bes bi ke “Rewşa başe” ra îstîfade bikero zî, Heyetê Çimdarî û Îdareyî 11ê temmuze de bi behaneyanê “beşdarê grevê vêşanîye bîyo”, “cezayê dîsîplînî est ê” û “poşman nîyo” veredayîşê Erdenî taloq kerd. Avûkatan îtîraz kerd. Badê îtîrazê avûkatan, mehkema 19ê tebaxe de qerar da û îtîrazê avûkatan qebûl kerd û waşt Heyetê Çimdarî û Îdareyî qerarê xo newe ra kontrol bikero. Qerarê mehkema de ameyo dîyarkerdene ke cezayê dîsîplînî û mendişê qawişanê girewteyanê sîyasîyan de nêeşkeno bibo sebebê taloqkerdişê înfazî. Mehkema dîyar kerd ke girewte Erden goreyê raporan û heme qaydanê hepisxaneyî hereket kerdo û qerarê Komîteyî de nakokî est ê.
Komîteyê Çimdarî qerarê mehkema binpay kerd
La nê qeraranê mehkema reyde zî Komîteyê Rayberîya Çimdarî 10ê êlule de newe ra kom bi û heme qerarê ke mehkema vat nêeşkenê bibê semedê taloqkerdişê înfazî, behane nîşan da û veredayîşê Erdenî 6 aşmî derg kerd. Bi nê qerarî Komîteyî qerarê dadgehî zî ame binpaykerdene û veredayîşê Erdenî heta 10ê adara 2026î ame taloqkerdene.
Persê ke Komîteyî Erdenî ra kerdî zî vera qeraranê mehkema bîyê. Persê Komîteyî nê yê: “Ti seba endamtîya rêxistine kewtî hepisxaneyî? Ti çira beşdarê rêxistine bîyî? Ê ke derheqê to de îfade dayo, sîvîl bîyê yan endam bîyê, mabênê şima de problemêk est bî yan? Cezayê to yê dîsîplînî est ê yan çin ê? Sebebê cezayanê disîplînî çi yê? Ti kamcîn qawişanê sîyasîyan de mendê, demo ke ti ameyî zî tîya de bîyî yan? Demo ke ti qawişanê sîyasîyan de bîyî, ganî şiam agahî û fermananê rêxistine bîyarê ca yan? Keyeyê to de kesêk têkilîya xo ya rêxistine reyde est a yan çin a? Sebebê cezayanê dîsîplînî zafane grevê vêşanîye yê, çira hende zaf ê? Nê çalakî takekesî yê yan? Ti çalakîyanê PKK’yî meşrû vînenê yan, ti derheqê serebûtanê verênan de senî fîkîrîyenî? PKK rêxistinêka terorî ya yan nê? 30 serrî ra pey ti poşman î yan nê?”
Parlamentera Newroz Uysal Aslan Komîsyonê Heqanê Merdiman ê Meclîsî zîyaret kerd û rewşa Salîh Erdenî resnaye înan û waşt bêro veradayene. Reyna Uysal pêşnîyazname zî pêşkêşê Wezîrê Edaletî Yilmaz Tunçî kerd û derheqê rewşa Erdenî de persî kerdî.
