Partî û rêxistinê kurdan ê Bakurê Kurdistanî derheqê hêrîşanê Rojawayê Kurdistanî de Amed de beyanato hempar da û va ganî her kes statuyê Rojava rê wayîr bivejîyo.
Partîya Herêmanê Demokratîkan (DBP), Partîya Komunîst a Kurdistanî (KKP), Partîya Azadî, Partîya Însan û Azadî (PÎA), Komeleya Kurdan a Şoreşger û Demokrat (DDKD), Komeleya Şêx Seîd û Platforma Yewîya Cinîyanê Kurdan derheqê êrişanê Tirkîya û grûba paramîlîterî ya SMO ke Bakur û Rojhelatê Sûrîye de yê, beyanato hempar da. Beyanat Komeleya Rojnamegeranê Başûrrojhelatî de ame dayene. Hemsereka Pêroyî yê DBP’yî Çîgdem Kiliçgun Uçar û temsîlkarê partî û rêxistinanê bînan zî beşdar bîy.
Beyanat hetê endama Heyetê Rayberîya Merkezî (MYK) ya DBP’yî Bêrîvan Helen Işik ra ame wendene. Beyanat bi nameyê “Pawitişê Rojava Pêardişê Yewîya Neteweyî yo” virazîya û tede bi lehçeyanê kurmancî û kirmanckî pankarta “Pawitişê Rojawa Pêardişê Yewîya Neteweyî yo” ame leqnayîş.
Beyanat wina yo;
“Dinya û mintiqaya ma de vurnayîşê muhîmî yê sîyasî yenê meydan. Sînorê ke verê 100 serrî hetê hêzanê serkewtoxan ra ameyê antene û statukoya ke ameya awankerdene ewro bi leze bedilîyena. Sey verê 100 serrî ewro zî Kurdîstan mîyanê nê vurîyayîşan de yo. Statukoya ke înkarê kurdan û Kurdistanî ser o virazîyaya, parçe bi parçe şikîyena û rewşêka sîyasîya newîye yena meydan.
Na rewşe verê cû seba şarê kurdî û dima seba her şar, bawerî û kulturê mintiqayî îmkanê destpêkêko newe dana. Hêvî na ya ke pergalêk bêro viraştene ke hemê unsurê nê erdî bi nasname, reng, veng û heqanê xo pîya bibê. La çi heyf zihnîyetê nijadperestî û yewperestî, dewletanê herême de îsrarê sîyasetê red û înkarî keno.
Rejîmê Sûrîye ke parçeyê pergalê înkarî bi, badê şerê zereyî yê 14 serrî di hewteyan de rijîya. Bi rijîyayîşê rejîmê Baasî reyna vejîya meydan ke tu îqtîdar û serdestîyê ke sîyasetê red û înkarî ser o virazîyayê nêşênê lingan ser o vindê. Seba Sûrîyeyêka newîye nêbeno ke hêzêkê zereyî reyna hukumdarîya xo awanîyanê bînan ser o awan bikero; yan zî hêzê teberî sîyasetê xo biramnê.
Seba awankerdişê pergalêko demokratîk hewce keno ke proseso sîyasî dest pêbiko û qederê Sûrîye hetê hemê unsuranê Sûrîye yê sey kurd, ereb, tirkmen, ermenî, durzî, êzidî, elewî, nusayrî û sunîyan ra bêro awankerdiş.
Tirkîya ke 14 serrî yo bêvengî hêrîşê destkewte û statuyê Rojavayê Kurdistanî ser o kena, ,binkewtişê rejîmê Baasî reyde hîna zaf lez da hêrîşanê xo. Tirkîya wazena bi hawayêko pêroyî Rojava, Bakur-Rojhelatê Sûrîye dagir bikero. Her çiqas bi destê çeteyan bêro kerdiş zî nê hêrîşî bi qerar, organîzasyon û hetkarîya Tirkîya yenê ramitene.
Qey coy ma veng danê:
- Verê her çî vengê ma şarê kurdî reyde yo. Statukoya ke çinbîyayîşê şarê kurdî ser o virazîyaya, ewro recifîyena û rijîyena. Êdî tehemulê şarê kurdî bêstatubîyayîşî rê nêmendo. Koalîsyonê dewletanê ke vera statuyê şarê kurdî yê, rijîyayo.
- Vengdayîşê ma yo dîyin raya pêroyî ya mîyannetewî rê yo. Ewro sedemê bingeyî yê kaosê Rojhelatê Mîyanênî parçekerdişê Kurdîstanî û bêstatu verdayîşê şarê kurdî yo. Hetê nînan de vera heme sîyasetê vînîkerdiş, êrîş û komkiştişan de zî şarê kurdî ewro sey hêzê îstîkrar û demokrasî yê tewr bingeyîn o.
- Vengdayîşê ma yo peyên şarê Tirkîya û humatê Tirkîya rê yo. Eke qalê biratîya hezar serran bena, ewro ganî Tirkîya hêrîş nêko destkewte û statuyê şarê kurdî yê Rojava ser o, eksê naye ganî têkilî ronê û piştî bidê.
Bi na wesîle ma vanê ewro roja pawitişê statuyê Rojava ya. Bêrê ma pîya Rojava bipawê.”
