Hepisxaneyanê Tirkîya û Kurdistanî de binpaykerdişê heqan dewam kenê. Kadri Şitilayî dîyar kerd ke lajê ey Serdar Şitilay 32 serrî û 7 aşmî yo hepis de yo û vat: “Lajê mi 30 serrî ceza girewtibî. Badê ke 30 serrî yê ey temam bî zî o veranêda. Heta nika heyetê hepisxaneyî şeş reye veradayîşê ey taloq kerd.
Hepixaneyanê Tirkîya û Kurdistanî de binpaykerdişê heqan dewam kenê. Pîyê girewte Serdar Şitilay o ke Hepisxaneyê Tîpa F ya bi Ewlewîya Berze ya Xarpêtî de yo dîyar kerd ke lajê ey 32 serrî û 7 aşmî yo hepisxane de yo û vat: “Lajê mi 30 serrî ceza werdibî. Badê ke 30 serrê ey temam bîyê zî o veranêda. Heya nika heyetê hepisxaneyî şeş reye veradayîşê lajê mi taloq kerd. Heyet lajê mi ra perseno vano ti poşmanî yan ney. O zî vano ez poşman nîya, eke ez poşman bîbîyêne ez do 30 serrî verî cû poşman bîbîyêne û mi do na ceza nêwerdêne. Heyetê Zîndanî xo keno herinda hakim û dozgeran. No ma rê heqeret o. Ma wazenê lajê mi cade veradê.”
‘Eke semîmî yê ganî girewteyanê nêweşan veradê’
Kadri Şitilayî bale ante têgêrayîşanê îqtîdarî ser o û da zanayene ke prosesê Aştî û Komelo Demokratîk bi hawayêko durust rayra bişîyêne ganî heya nika girewteyê nêweşî biameyêne veradayene û vat: “Girewteyê nêweşî girewteyê ke cezaya xo qedîyaya lazim o verabidîyê. Her roje merdimî yenê girewtene, girewteyê nêweşî veranêdîyenê, naye ra zî bawerîya mi bi nê prosesî çin a. Eke semîmî bîbîyêne ganî nê girewteyî verabidîyêne. Qanûnanê xo nêanê bi ca. Nê têgêrayîşanê înan ver bawerîya ma şikîyena. Waştişê ma o yo ke wa lajê mi veradê. No şeş reye yo ke veradayîşê lajê mi taloq kenê. Bi goreyê huqûq û edaletî ney bi keyfî têgêrenê. Cezaya lajê mi qedîyaya, sebeb çi yo ke veranêdîyeno. Wa qanûnanê xo bîyarê bi ca, tena qanûnanê xo bîyarê bi ca domanê ma zere de nêmanenê.”
‘Ez aştîye wazena’
Waya Serdar Şitilay Sîdar Şitilaye zî vate: Ma wazenê wa hinî Serdarî veradê, ma hinî deyax nêkenê, badê mergê maya ma zî hinî ma qet nêşkenê deyax bikerê. Ez aştîye wazena’, veradayîşê birayê xo wazena.”
