PYD’yî eşkera kerd ke şarê Şêxmeqsûd û Eşrefîyeyê ke vera hêrîşanê DAÎŞ’î, rejîmê Baasî û qewetanê ke dewleta tirke ya îşxalkere ra girêdayî yê, têkoşîn dano, tena nêverdanê. PYD’yî vengdayîşê piştîpêdayîşî kerd.
Partîya Yewîya Demokratîke (PYD) vera hêrîşanê qewetan ê Hukmatê Demkî yê Sûrîye yê taxanê Şêxmeqsûd û Eşrefîyeyê Helepî bi beyanatêko nuştekî şermizar kerd.
Beyanatê PYD’yî de ame dîyarkerdene ke heme şarê Sûrîye û dinya wextê awankerdişê Sûrîyeya newîye de bi dîyalog, yewbîyayîş û beşdarîya heme hetan paweyê ke kaos û bêîstîqrarî biqedîyo, Hukmatê Demkî bitaybetî peymana 1ê nîsane ke bi Meclîsê Şarî yê Taxanê Şêxmeqsûd û Eşrefîyeyî îmza kerdbî, heme peymananê îmzakerdîyan peygoş keno û wazenê seba mudetê demkî wext peyda bîyaro.
PYD’yî endîşeyê xo yê derheqê Hukmata Demkî de eşkera kerd, îfade kerd ke zehnîyetê hukmatî, dej û endîşeyanê şarî zêdeyêr keno û prosesê dîyalogê neteweyî asteng keno.
Hêrîşî dewam kenê
Beyanatî de ame vatene ke grûbê çekdarî ke dewleta tirke ra girêdaye yê ke Hukmatê Demkî yê Sûrîye mîyan de est ê, vera taxanê Şêxmeqsûd û Eşrefîye rayîran kontrol kenê, ambargo kenê û vera sîvîlanê ke vengdayîşê wedernayîşê ambargoyî kenê, hêrîşî dewam kenê. Na rewşe Dêr Hafîr û Benda Tişrînî ser o çalakîyan reyde wazenê ke Sûrîye de plananê vetişê şerêko girs virazê, qirkerdişî û talankerdişê welatî parçeyêkê nê planan o.
Vengdayîşê piştîpêdayîşî
PYD’yî vat: “Ma bi tewirêko pêroyî bawer kenê ke şarê ma heme komployê ke hedefê yewbîyayîşê ci, nasnameyê ci û cuya ci yê bo, nêresneno peynî. Şarê Şêxmeqsûd û Eşrefîye ke qehremankî vera hêrîşanê DAÎŞ’î, rejîmê Baasî û çeteyanê dewleta tirke ya îşxalkere têkoşîn dano, ma tena nêverdanê.”
Partî venga pêro Sûrîyeyijan û komelê mîyanneteweyî da ke goreyê aqil û berpirsîyarîye hareket bikerê, vernîya plananê fîtne û şerê mabênî bigîrê, xo nêkewê kayanê hêrs, neteweperestîye û mezheperestîye û piştîpêdayîşê komelkî bipawê.
Peynîya peyêne de PYD veng da Hukmatê Demkî: “Hêrîşan vindarnê, rayîr û beran akerê, vatişî û aplikeyên ke haştîya mabênî asteng kenê, biqedênê; probleman bê teda û çekan, bi dîyalogan cehd bikerê ke çareser bikerê.”
