Partîya Herêmanê Demokratîkan (DBP) serrgêra Komploya 9ê Citmenge ser o beyano nuştekî da. Beyanat de ame vatiş ke: “Pêro şaranê Kurdîstan û Tirkîya, rayapêroyîya mîyanneteweyî ke wa azadîya fîzîkî ya Birêz Ocalanî biwazê û wayîrê vengdayîşê aştîye û komelê demokratîkî bivejê. Çike, bê azadîya Birêz Ocalanî, Rojhelatê Mîyanênî de peydakerdişê aştîye û îstîkrarî mumkun nîyo. Na raştîya tarîxî ya.”
Rayberê Şarê Kurdî Abdullah Ocalan ke Sûrîye de bi komploya hêzê mîyanêneteweyî ra rî bi rî mend, verê Darbeya Lejkerî ya 12ê Êlula 1980î şî Sûrîye û 9ê Citmenga 1998î de nêçare mend ke şîro Ewropa. Dima Sûrîyeye ra vejîya, welatê Ewropaye ke serdayîşê înan kerd, sey ‘kesê nîno waştiş’ ame îlankerdene, 15ê Sibata 1999î de ey ardî Tirkîya.
Demê ardişî ey ê Tirkîya ra, Rayberê Şarê Kurdî Abdullah Ocalan Girawa Îmraliyî de hepîs kerdî la dormeraya Rayberê Şarê Kurdî Abdullah Ocalan de kurd û hevalbendê kom bîyê û xo rêxistin kerdî. Nika zî Tirkîya de prosesê Komelê Demokratîkî domyeno.
DBP’î serrgêra Komploya 9ê Citmenge ser o beyano nuştekî da.
Beyanat wina yo:
“Komployo ke 9ê teşrîna verêna 1998î de bi destê hêzanê mîyanneteweyîyan û welatanê herême vera Birêz Abdullah Ocalanî ame destpêkerdene ra dima 27 serrî derbas bîyî. Proseso ke Sûrîye ra vejîyayîşê Birêz Ocalanî reyde dest pê kerd, hetê tesîr û netîceyanê ci ra ewro hem Rojhelatê Mîyanênî hem zî wareyê kûrewî de beno sebebê averşîyayîşanê komelkî û sîyasîyan.
No komplo têna yew merdimî hedef nêgeno; bingeyê bêçareserîya persa kurdan de şekil girewto, berhemê pêkerdiş, yanî konsensuso ke mîyanê hêzanê herêmî û mîyanneteweyîyan de virazîya yo. Hêzê ke seserre verî Rojhelatê Mîyanênî de sînorî xêze kerdî, na rey vera fikrê neteweya demokratîka ke şaran rê modelê cuye yê newî pêşkêş keno, têgêrenê. Na çarçewa de komplo nîşanê terso ke pergalê netewe-dewlete vera îxtîmalê ravurîyayîşê demokratîko ke estîya ey rê gefan waneno, hîs keno yo. Komplo sere de DYA, NATO û welatê Ewropa çarçewaya menfaetanê hemparan ê hêzanê kûrewîyan de ame plankerdene; Tirkîya zî ware de caardoxê nê planî bîye. Hedefê înan astengkerdişê têkoşînê şarê kurdî yê rewa, astengkerdişê dînamîkanê demokratîkanê ke Rojhelatê Mîyanênî de qewimîyayî û ramitişê statuyo ke netewe-dewlete xo rê esas geno bî. Nê semedî ra komplo, têna vera kurdan nê, vera şaranê Rojhelatê Mîyanênî zî hêrişo stratejîko ke ameyo caardene yo.
Labelê Birêz Ocalanî, rixmê şertanê tecrîdî yê giranan ê Zîndanê Îmrali, bi paradîgmaya xo ya “Komelê Demokratîkî” hetê îdeolojîk û sîyasî ra komplo pûç kerd. Perspektîfê xo reyde alternatîfo ke cuya şaran a hempare, azadîya cinîyan, muwazeneyê ekolojîkî û demokrasîyê rasterastî esas geno, pêşkêş keno.
Ewro Rojawan ra heta Bakûrî şaro kurd û hêzê Rojhelatê Mîyanênî yê demokratîkî, çarçewaya nê perspektîfî de rêxistin benê, vera modelê netewe-dewlete yê înkarker û tedakerî modelanê cuye yê alternatîfan awan kenê. La çi heyf ke vengdayîşê aştîyane 27 serrî yo nênê goşdarîkerdene, herinda çareserî tecrîd, tedakerdiş û polîtîkayê çinkerdişî ameyî caardene. Bi no hawa hêvîya cuya hempar a şaran, aştîya komelkî û hêvîya sîyasetê demokratîkî ameye tecrîdkerdene. Ewro Rojhelatê Mîyanênî de şerê ke xorîn benê, krîzî û bêîstîkrarîye ramojnenê ke komplo formanê cîya-cîyayan reyde ramîno. Coka nêzdîbîyayîşê Birêz Ocalanî yo “Komelo Demokratîk” ganî têna seba şarê kurdî nê, seba şaranê dinya sey xerîtaya rayîrî ya cuyî bêro hesibnayene.
Sey Partîya Herêmanê Demokratîkan ma reyna îfade kenê: vera modernîteya kapîtalîste û sîyasetê netewe-dewlete yê rijnayîşî, vengdayîşê aştîye, azadîye û cuya demokratîke yê Birêz Ocalanî cewabêko hêzdar o. Çîyo ke hêzê komplokerî pêşkêş kenê, gonî, hesire û kedewerdiş o. Vera nê çîyan xêza Birêz Ocalanî ya çareserî; wayûbirayîya şaran, azadîya cinîyan, cuya ekolojîke û bingeyê demokrasîyê rasterastî de rayîrê azadî yo rastikên o.
Bi na wesîla, ma veng danê pêro şaranê Kurdîstan û Tirkîya, rayapêroyîya mîyanneteweyî ke wa azadîya fîzîkî ya Birêz Ocalanî biwazê û wayîrê vengdayîşê aştîye û komelê demokratîkî bivejê. Çike, bê azadîya Birêz Ocalanî, Rojhelatê Mîyanênî de peydakerdişê aştîye û îstîkrarî mumkun nîyo. Na raştîya tarîxî ya!
Partîya Herêmanê Demokratîkan”
