Verfeka DEM Partîye Ayşegul Dogane ard ziwan ke ê prosesêko tarîxî de yê û wina va: “Komîsyon nêçare ke formulêkî peyda bikero ke Abdullah Ocalan bieşkero ercnîyîşê xo komîsyon reyde biresno.”
Verfeka DEM Partîye derheqê rojeve de merkezê pêroyî yê partîya xo de kombîyayîşêko çapemenîye viraşt.
Ayşegul Dogane ard ziwan Tirkîya seba çareserîya aştîyane û demokratîke ya problemê kurdî demêko tarîxî de derbas beno û wina va: “Ma va, ma na mesela pîya çareser bikerî û bi ser bikewê. Gamê ke mîyanê nê demî de ameyê eştiş bêguman seba demokratîkbîyayîşê Tirkîyaye û mendebîyayîşê aştîya xeylê avzel ê. Ma qalê rewşa şerî kenî ke bi serran o dewam keno, destpêkî ra ma hewl dayê ke nêzdîbîyayîşêko pîyagirewteyî nîşan bidê. Ser na babeta hesas hesabê menfaetî û ranta sîyasî mekerê.”
‘Vera nijadperestî û nefretî de wa ma bi vengêko berze qisey bikerê’
Verfeka DEM Partîya vengê verpirsîyarîya heme partîyê sîyasî, pawitoxê heqê merdiman ê Tirkîyaye rê kerd û wina domna: “Na yewe nê tena verpirsîyarîya DEM Partîye ya. Ma kehenşopîyêka sîyasî ke meseleya demokrasîya Tirkîya de tewr vernî de têkoşîn danî. Vera nijadperestî û nefretî de wa ma bi vengêko berze qisey bikerê. Ma rexneyê xo zî her tim vanî; birêxistinkerde eşkaynî, komîsyon Birêz Ocalan reyde pêvînayîş bikero. Nê rexne û fikarê ma yê hembar ê.”
Cewabê Dervîşogluyî
Dogane wina domna: “Zîhnîyeto lêmin xo kursîyê Meclîsî de nîşan da. Xo binê sîya partîyêka sîyasî de nîşan da û eşkera bi. Bi ziwanê Serekê ÎYÎ Partîye xuya kerd ke hêrişê partîya, bi milyonan merdimê ke partîya ma, înan temsîl kena. Partîyê sîyasî ke xo gonî, mergî û dişmenî ra xo wayîr kenî, nameyê înan zî nêmaneno. Ganî no zîhnîyet bêro dîyayîş, bêro famkerdene û cewab bêro dayene.”
Komîsyon wa seba Abdullah Ocalan formulêk bivîno
Dogane destnîşan kerd ke komîsyon nêçare ke formûlêk bivîno ke Rayberê Şarê Kurdî Abdullah Ocalan bieşkero ercnayîşê xo komîsyonî ra biresno û wina qedîna: “Seba ke komîsyon eynî demî de verpirsîyar o. Birêz Ocalan ne tena rayberê awankerdox o, eynî demî de hêzê awankerdoxê çareserîya demokratîke û aştî yo. Wa kesêk bi Tirkîyaye dem nêdo vindîkerdene, welatperwerî heskerdişê nê welatî yo. Nê nijadperestî nê ziwanê nefretî yo.”
