Komela Xoza û Kulturê Dersîmî meydanê Seyid Rizayî de şahîya Gaxane viraşte. Berpirsyarê kome Mehmet Yuksel serê namê kome gesî kerd.
Gaxane seba şarê Dersimî û şaranê Mezopotamya mîjdana serra newîye wa. Serra kane êna rastkerdene û serra newîye zî bi loqman bi miyazan nêtê rindîye û bimbarekîye êna virankerdene.
Komela Xoza û Kulturê Dersîmî meydanê Seyid Rizayî de şahîya Gaxane viraşte. Berpirsyarê kome Mehmet Yuksel serê namê kome qesî kerd.
Yukselî kilm qesîkerdena xo de seba maneyê Gaxane nîya va: “Raya ma Elevîyan de tayê rojê henênî estê ke nî komela ma payra gênê, pîya jû ca de danê girotene. Sarê nînande Gaxane yena.
Kulturê ma de vatena Gaxane yena maneyê sarê serra newîye. Kalo Kokim vanîme no yeno mana serra kanê. Serra kane temsîl keno. Ma nî ra vanîme padîşa vanîme. Verî pîr û kalanê ma vatêne ke: “Ya paşawo newe, ya serra newîye ti yena verî qom û qewûlê xo, der û cîranê xo, herkesî rê yardim bike, domananê ma zî xatirê deyî sane.” Nînî vatêne. Raya Elevîtîye de parekerdene esta. Xoza ra hardê dewrêşî serr de çi esto pêrûne ra wayîr vecîyayîş esto. Qedir û qîmet esto. Rojanê nîyanênan de xatirê der û cîranan ê zeyîyan ê feqîr û fiqarî zanitene esta. Şonê kêyanê zeyîyan înan serdayîne. No gorê inamê ma Dersîmijan qîmet dayena cinîyana. Komela ma Dersimijan komela Maya, komela cinîyana. Verêna zerê keyê ma de en çîyo bi xatir cinîyê ma de. Gorê ma cinîye keraya bingehîna. Komela ma Heq, Huqûq, parekerdene û pakbîyene zaf wayîrê cayêde berzîyê.
Raya ma Elevîyan de pakbîyayene zaf cayêde giran gêna. Xirabîye ra durî vindetene, der û cîrananê xo ra haşt vindetene, waxto ke tayê meselê nêweşî vecîyayî nî meselan bi haştîye bi ziwano weş halkerdene pakbîyayena.
Gaxane de hîrê kesî hîrê temsîlîyetî estê. Kalo Kokim bawerîya ma de însanê Kamilî û serra kane temsîl keno. Verêna ma kalanê xo pîranê xo kamil zanîme, qîmet danîme cî. Kalo Kokim şono û cayê xo dano gêncan. Fadike zî dinya temsil kena. Her çîyê serê dinya êno şono hema dinya cayê xo de vinderta. Fadike zî dinya mendîye û rindekîye û dinya newîye zî temsil kena. Ê hîrîne zî Kose yo. Kose sera newîyake hîna roştîya xo astarikê xo nêvecîyê, tîca xo hîna nêbiriqîya hîna sera newîye nêkewteyene temsîl keno.
Sera newîye 21 Kanûne û 21 adare seba ma hîrê aşmê ke jûbinîra giredayîyê. Bimbarek bo şarê marê û şaranê binan rê haştîye û biratîye biyarê.”
