Spîkera xeberan yê CAN TV Ezgî Soysale, hetê keyeyê xo de rastê şîdet û kûyayîşê cîrananê xo amê. Hîrê serrî ra zêdêrîyo ya û pîyê aye rastê tehdîtan û tacîzanê nê cîranan benê. Rojnameger ezgî Soysale derheqê înan de zaf rayan muracatê qereqol, CÎMER û şaredarîye kena la yew game nêna eştene.
Ezgî Soysale vana “Ewlehîya canê mi çin a. Seba ke tedbîrî nêameyî girewtene şenik mendbî ke ez bîyamêne kiştene.”
Ezgî Soysala ke weşîya xo Îstanbul de ramena û karê rojnamegerîye kena nêzdîyê çar serrano ke taxa keyeyê xo de yena rehetsiz kerdene û rastê şîdetê fîzîkî yê cîrananê xo yena. Rojnameger Soysale derheqê înan de zaf rayan muracatê qereqol, CÎMER û şaredarîye kena la yew game nêna eştene. Sereyê serra 2025î de 3 cinî hêrişê Ezgî Soysale kenê û nê hêrişî de yew bêçika xo şikîna. Aşma nîsane de zî nê cîranî hêrişê pîyê Ezgîye kenê û pê kiştene tehdît kenê.
Na defa peyêne zî 28ê Teşrîna verênede roja Sêşemeyî de wexto ke vera keyeyê xo şona hetê komêka qasê 10 kesan raya xo birîna û bi giran yena kuyayene. Peyayê ke rayera vêrenê ra ey kunê mabên û xelesnenê ra. Ezgî Soysale vana: “Ey kesan ra nêbîyêne belkî ez amebî kiştene. Çike derbê mergî dêne sareyê mi ra, zereyê mi û mîyanê mi ra. Hetê ra zî heqeret û kifrî kerdêne.”
Dima nê herişî ra Rojnameger Ezgî Soysale şina xestexane û bado zî qereqol de gereyê nê kesan kena. Wina vana: “Nê kesî zê komeka organîze plan virazenê û yenê vernîya ma birnenê û wazenê ke mi bikişê. Reyna zî bê ceza manenê. Hetanû nika ne qereqolî ne zî dozgerîyê çîyê nêkerdo. Nê karî ganî nîya giran rayera meşorê. Çike ewlehîya canê ma çîn a.”
