Verfeka DEM Partî Ayşegul Dogan vera hedrekerdişê butçe reaksîyon nîşan da û va ke na butçe seba aştî nê seba şerî yena hedrekerdene.
Komîsyonê Plan û Buçte yê Meclîsî de Qanûnê Butçe yê Rayberîya Merkezî ya Serra 2026î ser o pêvînayîşî yenê kerdene. Pêvînayîşan de Verfeka DEM Partî Ayşegul Dogan qisey kerd û vat ke çimê her kesî na butçe ser o yê labelê na butçe waştişê ciwan, feqîr, kedkar, karker, ciwan û cinîyan ca nêgînê.
Ayşegul Dogan wina vat: “Çi heyf ke butçe de qet behsê feqîrî nêameya kerdene, dewleta sosyale ra zî nêyena behskerdene. Ez ewnîyaya demokrasî est a, a zî çin a. Çekûya huqûqî yew reye tena vîyarena, se ra 70î komelî nika rewşa Tirkîya ra nêrehet o. Ma zanenî kam na butçe ra zengîn beno, ameyîşê na butçeye kura ra yeno. Tena feqîran ra na butçe yena qezenckerdene. No zî bêadaletî yo.”
‘Na butçe hedreyîya şerî ya’
Ayşegul Dogan dîyar kerd ke teklîfê butçe de qet şikê îstîhdamî çin o û wina dewam kerd: “Na butçe de seyyewbînîya zayendî û îstîhdamê cinî zî çin o. Çareserîya bêkarî zî çin a, teşwîqê îstîhdamî zî çin o. Na butçe seba aştî nê, seba şerî yena hedrekerdene. Seba herînayîşê çekan na butçe ameya zêdekerdene. Prosesê Aştî û Komelê Demokratîkî firsendanê neweyan awan keno. Na butçe çarçeweya prosesî de nêameya hedrekerdene.”
