Mehmet Mukan sanikan ser xeylî gurîyo û kom kerdê tayê înan kerdê kitab şarê ma ra vano ke: “Zon secereyê miletûn o, her mîlet ewe zonê xo nas beno, zon ke bî vîndî, o mîlet kî beno vîndî.”
Mehmet Mukan dewa Dêrsimî Keysura de weşîya xo ramneno. 25 serrî malimtîya Almankî ra dima teqawit beno û keweno sanikandima .
Sanikan ser o kitabê “Sanikê Zazaû,” “Sanikê Ma 1-2” Taê Hekîatî” xo estê. Arêdayena sanikan ser xeylî gurîyo. Tayê sanikan pîyê xo ra, tayîne zî kê be kê dewijanê xo ra, tayîne ne zî naskerdeyanê xo ra gêno. Mehmet Mukanî hem ajansê ma rê qisey kerd hem zî yew sanika xo ma de pare kerde.
‘Sarê ma zaf sanikê xo kî kerdê vîndî’
Mehmet Mukanî, qisey kerdîşe xo de marê vîndî bîyayîşê sanikan ser wina va: “Dewî ke kerdî tal, sarê ma qelebîya sûke. Şîya kê be kê gêra û mi nê sanikê girewtî. Fabl’e La Fontaîne esto, sanikê ma kî jê fablanê dî yo. Sanikanê ma de kî lûye esta qisey kena, hesê birî qisey keno, kenger û kemerî qisey kenê. Mi sanikû ser kitabî vetî, sanikû ser, fabl ser. Zonê tirkî ke ame qisey kerdene aye ra nat sanikî xo vîrîra kerdî û sanikî bî vîndî. Domanîya mî de perûne zonê xo qisey kerdêne. Mekteb ke ra, domanî tirkî mûsayî, çê de domanan tirkî qisey kerd û kokûmê ma asîmîle kerdî.”
‘Sarê ma saya sanikan ra hetanû nika amo’
Mehmet Mukanî qisey kerdîşe xo de, hetê zonî ra binê mihumîya sanikan xêz kerd û wina va: “Çira zonê xo sanikû ser ramnena. Hîn ke nêbîyêne, zon rew merdêne. Çiqas ke mordem zonê xo de sanikû vajo, handê rindo. Sanikî şîndorê zonî kenê hîra. Zerê sanikû de zaf qesey vêrenê ra. Teyna sanikû zanitene nêbeno, zonê xo qisey bîkere.”
‘‘Musnayîşê zonî zerê çeyîde beno’
Mehmet Mukanî musnayîşê zonî ser vatenê xo wina domnayî: “Mayî û pîyî eke zereyê çeyîde zonê xo qisey bikerê rind beno. Nika kokimê ma zêde nêmendê. Domanî şîyê mekteb tirkî musayî, kokimî domanan de qisey bîkerê, domanî ziwan nêzanenê. Mileto ke mektebê xo nêbî ziwanê xo keno vîndî.”
‘Qiymet bidê zonê xo’
Mamoste Mehmet Mukanî peynîya qiseykerdişê xo wina arde: “Sarê ma qirkerdene dîya, mektebê xo çin bî. Zon û îtîqatê xo, rayê xo lete de biriyo. Jêde hayr û heşarê zonê xo kî nêbîyê. Hîn amo hatan nika. Çitur vajî, zon ser kitav vejîno, sima ke ne wendî, zon zerê kitaw de maneno. Hona zonê ma vîndî nêbîyo, qiseyke nêkerê beno vîndî. Sarê ma sanikû je verî qisey bikero. Jêde televîzyon verde waxtê xo meşêro. Sarê ma ra vana ke, zere de, tever de, esnafû de, mektev de, dayîranê hûkmatî de, otobusan de, çixa bese kenê her cayan de qisey bikerê. Cenç qiymet bikerê zonê xo. Zonê jû sarî ke bî vîndî, o sar merde say beno. Alîmê zonî vanê ke, zon secerê miletî yo, zon ke beno vîndî, o milet kî beno vîndî.”
