Sêrt de şuxulnayîşê madeyê kungkerdişî zêdîyeno, merkezê ci yê tedavî çîn o. Ciwanî qederê xo rê ameyî caverdayene.
Sêrt de o ke nufusê ci 300 hezar o, şuxulnayîşê madeyê kungkerdişî zêdîyeno û kesê ke şuxulnenê çend şino serrê înan yenê war. Bajar de semedê nê têna merkezê YEDAMî est o. Tewr peynî de netîceya trajedîya ke bi sebebê pabesteyîya madeyî ameye meydan, qezaya Kurtulan de Onur Ariyo ke binê tesîrê madeyî de bi, di kesî mirnayî û hîrê kesî birîndar kerdî. Dîya zanayene ke Ariyî verî tedawî dîyêne la wextê kilmî de reyna dest pê şuxulnayîşê madeyî kerd.
Seba ke merkezê tedavî çîn o kesê ke pabesteyê madeyî yê bajaranê sey Îzmîr û Xatpêtî rê yenê şawitene. La xeylê kesî nê bajaran de tedawî caverdenê û agêrenê. Wekîla DEM Partî ya Sêrtî Sebahate Saritaş zî derheqê babete di pêşnîyazê persan dayî la wird pêşnîyazî zî bêcewab mendî.
Hemwelatîyêkî waşt birayê xo yê pabesteyîya madeyî ra bixelisno wina vat: ”Mi pêro berê dewlete cinayî la qet çewî hetkarî nêkerd. Qanûnî kesê ke pabesteyê madeyî yê tedawî nêkenê, ancenê mîyanê sûcî. Birayê ma polîsan reyde gêrayêne, herinda tedawî de o şuxulnayêne. Mi birayê xo berd AMATEMê Amedî la ûca de zî nêame qebulkerdene. Mudirî vat ê nêeşeknê pêro kesê ke yenê tedawî bikerê. A roje tedawî nêbi roja bîne kard ante dayîka xo. Tirkîya de programê vera madeyê kungkerdişî çîn o. No sîstem verê sûcî nêgeno, dahîna zaf akeno.”
