Hunermende Ezda Karacadag derheqê ZIWAN-KURD ke demêkê nêzdî de Sêwreg de do bêro akerdiş ser o qisey kerd û bale ant muhîmîyê bîyayîşê sazgehê cinîyan ser. Ezda Karacadag wina va: “Ma wazenê ke cinî nika de potansiyelê xo vejê werte.”
Komeleya Cigêrayîş û Averberdişê Kultur-Huner û Ziwanê Kurdî (ZIWAN-KURD) demêkê nêzdî de qezaya Sêwregî ya Riha de do bêro akerdiş. No di aşmî yo xebatê semedê sazgehî dewam kenê û koma ke xebatan domnena zî vera ke hetkarî tu sazgehî ra bigîro xebatêk komunal domnena. Sazgeho ke demêk nêzdî de do bêro akerdiş, yeno waştiş ke beşê ziwan, kultur û hunerî bêrê akerdiş.
Hunermende Ezda Karacadag ke nê di aşmî ZIWAN-KURD de dîwaran ser o grafîkê modelanê tarîxê kurdî û cinîyanê kurdan viraznena, ajansê ma rê qisey kerd.
‘Ez binê tesîrê cinîyan de manena’
Ezda Karacadag destpêkê qiseykerdişê xo de bale ant ser muhîmîya tarîxê cinîyan û têkoşînê înan yê hemverê zihnîyetê serdest ê mêrdan û va: “Destpêkê tarîxî ra heta nika, cinîyê kurdî erdê xo ser şikil danê cuya xo. Komel de bi roşnvîrîya xo serkêşî kerd. Wayîrê hêzêk wina xurt bî ke çar madeyan ser o derman viraştêne. Cinî hende xurt bî ke çi heyf bi hezaran serran o hetê zihnîyetê lêşîna ra yenê qetilkerdiş. La her çiqas nê bikê rê zî nêresayî armancê xo. Ez zî binê tesîrê nê de menda. Mi waşt ez reng, sîmge, enerjîya înan, tabloyanê xo de bineqişnî. Reyan ma dewanê Qerecdag, Sêwregî de gêrenê. Ma hîkayeyanê cinîyan ê nika goşdarî kenê. Ez tesîrê înan de manena. Semedê ke behsê mîtolojîyî kenê. Ez çermê înan ra ewnîyena, her motîfêk tarîx, cematî qal keno.”
‘Di aşmî yo ma na xebate domnenê’
Ezda Karacadag dewam de averşîyayîşê fikrê ‘ZIWAN-KURD’ ser o zî ercnayîş kerd û wina dewam kerd: “Sêwreg de potansiyelêk pîl est o. Sîstemê kapîtalîst xo çiqas aver bero zî Riha, Sêwreg de kulturê xo domnenê, cil û berganê xo danê xo ra, deqê înan est ê. Ez binê nê tesîrî de manena. Demo ke ma deqanê înan cigêrayîş kerd, ma berdî demê zaf verênî, heta ma berd Gobeklî Tepe. Heta nika mi tena bi sereyê xo na xebate domnayîne. Dima ra ma xeylêk hevalan dir ameyî pê û ma sazgehêk viraşt. Sêwreg de sazgehê kultur, ziwan û hunerî çinbî. No do yê verêne bibo. No di aşmî yo ma kedêk pîl danê. Ma xebatanê xo domnenê.”
‘Lazim o potansiyelê cinîyan tîya de vejîyo werte’
Ezda Karacadag peynîya qiseykerdişê xo de da zanayene ke sazgeh, semedê şarê Sêwregî zaf muhîm o û wina peynî ard: “Nê prosesî de eleqeyê şarî pîl bî. Ma şarî ra hêz girewt. Ma kêfweş bî. Karê ma meraq kenê. Ma zî înan ra vanê. Ma do wareyê kultur û ziwanî de averşîyayîş virazê. Ma do têkilîyê xo xurt bikerê. Armancê akerdişê komeleya ma no yo. Lazim o potansiyelê cinîyan nika de bêro vejîyayîş holê.”
