Hemserekê MED-TUHAD FED’î Kerem Canpolat ser rewşa hepisxaneyan qisey kerd û ard ziwan ke zextê ser hepsîyan pê yenê, girêdayî tecrîdê ser Rayberê Şarê Kurdî Abdullah Ocalan ê.
Hemserekê Federasyonê Komeleya Paştdayî û Huquqî ya bi Keyeyanê Hepsîyan ra (MED-TUHAD FED) Kerem Canpolat bal ant ser zextê ser hepsîyan aver şonî û wina va: “Dewlete goreyê ruhê prosesî gaman nêerzena. Wa serî de Rayberê Şarê Kurdî Abdullah Ocalan azad bibo, wa hepisxaneyî heme bêrê vengkerdene”
Hemserekê MED-TUHAD FED’î Kerem Can Polat derheqê azadîya fîzîkî ya Rayberê Şarê Kurdî Abdullah Ocalan de qisey kerd û wina domna: “Ma Birêz Ocalanî rê sey kesêk nêewnîyenî. Ma sey temsîlkarê şarêkî ey rê ewnîyenî. Abdullah Ocalan temsîlkarê vîrdozîyêk keno. Prosesê aştîye dima vengdayîşê ey dest pêkerd. Armancê ma tecrîdê ser Birêz Ocalanî bêro hawanayene û ci rê girêda heme hepsîyê zindanî bêrê veradayene.”
‘Proses vatişî de maneno’
Kerem Canpolat bal ant ser rewşa hepsîyan û wina qedîna: “1ê Citmenge de prosesêk ame destpêkerdene, bi xususî nê prosesî de zextê ser hepsîyan zêde bîyê. Zext tena bi destê rayberîya hepisxaneyî pê nînê, bi agahîya Wezaretê Adaletî pê yenê. No netîce polîtîkayê hukmat û dewlete yê. Aştîyêka mende bi azadîya fîzîkî ya Rayberê Şarê Kurdî Abdullah Ocalan û azadîya hepsîyan ra girêdayî ya.”
