Şaredarîya Peyasî, semedê kesanê ke nêeşkenê werdê bi glutenî biwerê, taxa Firatî de bi merasîmêko biheybet “Merkezê Cuye yê Bêglutenî” akerd.
Merkezê ke hetê Şaredarîya Peyasî ra serê erdekê 9.400 m² de ame awankerdene, tede firinêka taybete ya semedê nêweşanê çolyakî, qahwexane û park estê. Merasîmê akerdişî de xeylê kesî amade bîyê.
Merasîm de Hemşaredaranê Peyasî Bêrîvan Gulşen Sîncar û Cengîz Dundar, Hemşaredarê Şaristanê Girdî yê Amedî Dogan Hatun, Serekê Odayê Tîcaretî yê Amedî (DTSO) Mehmet Kaya, Serekê Amedsporî Nahît Eren, Serekê Komeleya Çolyakî yê Amedî Ekrem Varlî, Dayîkanê Aştîye, hemşaredarê Pasûrî, Şaristanê Neweyî, Sûrî, Farqînî û Rezanî, temsîlkarê rêxistinanê komelê sivîlî û xeylê welatijî beşdar bîyê.
“Ma cehd kenê bibê cewabê hêvîyanê şarê xo”
Hemşaredare Bêrîvan Gulşen Sîncar qiseykerdişê xo de wina vat: “Ma bi felsefeyê şaredarîya demokratîke û komelkîye, bi şanazîyêka girde xizmetanê neweyan pêşkêşê şarê xo kenê. Ma cehd kenê ke bibê cewabê hêvîyanê şarê xo. Nê çarçeweyî de xebatê ma yê resnayîşê xizmetan seba domanan, cinîyan, extiyaran, kesanê astengdaran û hemû beşanê komelî do bê mabên dewam bikerê.”
“Xebatê ma yê semedê projeyanê neweyan dewam kenê”
Hemşaredare Bêrîvan Gulşen Sîncar peynîya qiseykerdişê xo de wina va: “Semedê awankerdişê 2 salonanê sporî yê ke tede hewuzê nîv-olîmpîkî estê, ma Wezaretê Sporî û Walîtîya Amedî de pêvînayîşanê xo dewam kenê.”
Hemşaredarê Peyasî Cengîz Dundarî zî bal ant muhîmîya projeyî ser û wina qisey kerd: “Nêzdîyê 6 aşmî yo ke ma nê projeyî ser o xebetîyenê. Çolyak nêweşîyêk a û bêglutenbîyayîş semedê nêweşan ciwîyayîşî yo. Amed de 10-12 hezar kesî bi nê nêweşîye reyde rî bi rî yê. Wezîfeyê ma o yo ke ma cewabê hewcedarîyanê welatijan bidê û projeyanê winasîyan bivisnê merîyetî.”
Badê qiseykerdişan kurdeleya Merkezê Cuye yê Bêglutenî ameye birnayene û werdê bêglutenî yê taybetî ameyî pêşkêşkerdene.
