Platformê Kede û Demokrasî yê Dersimî, vera qirkerdîşê elewîyanê ke Sûrîye de yê reaksîyon bimojnê, Kuçeyê Hunerî de eşkerayî daye. Eşkerayî de ame dîyarkerdene ke ganî vera nê qirkerdişan proseso sîyasî bêro rayraberdene.
Sûrîye de dimayê rijîyayîşê rejîmê Baasî ra pey ke HTŞ’yî ame îqtîdar, vera elewîyan hêrişî ameyê kerdene û roje bi roje nê hêrişî zêdîyenê. 23ê teşrîna peyêne ra yo ke şaristananê Lazkîye, Humus, Tartus û Hama de vera elewîyan hêrişî yenê kerdene. Seba ke nê hêrişan protesto bikerê, eşkerayîyê çapemenî yenê dayene. Platformê Kede û Demokrasî yê Dêrsimî seba ke vera nê hêrişan reaksîyon bimojnê, Kuçeyê Hunerî ra heta merkezê şaristanî rayîrşîyayîş organîze kerd.
Rayîrşîyayîşî ra pey eşkerayî hetê Hemserekê Şaristanî yê Dêrsimî Ozcan Ateşî ra ameye wendene.
‘Huqûqê Sûrîya her kesî nêgêno zereyê xo’
Ozcan Ateşî dîyar kerd ke nê hêrişî heme cayê Sûrîye de bi hewayêko organîze yenê kerdene û wina vat: “23ê teşrîna peyêne ra yo ke Sûrîye de vera elewîyan hêrişî yenê kerdene. Keyê înan yenê veşnayene, sîvîlî yenê kiştene û gedeyî yenê remnayene. No zî mojneno ma ke nê hêrişan reyde wazenê rasterast nasnameyê elewîyan hedef bigîrê. Qomê Dêrsim wa bizano ke Sûrîya de elewîyî yenê qirkerdene, elewîyî yenê kiştene. Nêverdanê ke bêrê pêser, vengê xo berz bikerê. Huqûqê Sûrîya, êyê ke weşîya xo uca de ramnenê pêrûnan nêgêno zereyê xo. Elewîyî Sûrîye de bese nêkene xo bixelesnê. AKP û Colanî, karê xo pîya kenê. Nê cîhatî wazenê, şarê elewî ser o bargiranîye anê.”
Ozcan Ateşî peynîya qiseykerdişê xo de dîyar kerd ke ganî meclîsê Tirkîya vera nê qirkerdişî bêveng nêmana û heyetêk viraza ke şêro herême û wina qedîna: “Êyê ke aştî û rindîye wazenê wa bêrê pêser û nêverdê ke elewîyan qir kerê. Eke ma paştî bidê yewbînan, raştîya xo zanîme.”
