Pêvînayîşê komîsyonî ra pey, sey lazimîyanê gama diyine zî; babeta tewr girînge, tewrbîyayîşê Rayberê Şarê Kurdî Abdullah Ocalanî yo ke bi şertanê têduştîye û azadan, sey sermuzakereker rolê xo kay bikero. Hem azadîya fîzîkîye hem zî vurîyayîşê şertanê cuye û xebate, seba ke proses bi serkewtiş netîce bibo, mecburî yo.
Komîsyonê prosesî peynî de şî Îmrali û Rayberê Şarê Kurdî Abdullah Ocalanî reyde pêvînayîş viraşt. Çi heyf ke kombîyayîşê komîsyonî de tena kilmvateyê ci ame wendiş, nêyî zî niqaşan rê ber akerd. Nika her kes nê prosesî de bendê gama dîyîne yo.
Sey lazimîyanê gama diyine zî; babeta tewr girînge, tewrbîyayîşê Rayberê Şarê Kurdî Abdullah Ocalanî yo ke bi şertanê têduşte û azadan, sey sermuzakereker rolê xo kay bikero. Hem azadîya fîzîkîye hem zî vurîyayîşê şertanê cuye û xebate, seba ke proses bi serkewtiş netîce bibo, mecburî yo.
No zî xo reyde seba demê vernîya ma nê persan ano; Rayberê Şarê Kurdî Abdullah Ocalanî komîsyonê meclîsî rê çi vat? Komîsyonî tena yew raye goş da serê vatena Ocalanî? Şumûl û zereyê pêşnîyazanê qeraran do senî bibê? Pêşnîyazanê qeraran ke do pêşkêşê meclîsî bibê, înan de hemparîyêka senêne do bivejîyo? Hewldayîşê raye ra vetiş û provokasyonî ûsn…
Goşdayîşê Komîsyonî yê Rayberê Şarê Kurdî Abdullah Ocalanî seba ke raye ra vetene, wexto ke azadîya fîzîkîye û gamê qanûnê bingeyînî ameyî rojeve bi vatişê “waştişê maksîmalîstî” yeno redkerdiş û seba ney hewl dîyeno. Sîyasetê Tirkîya de, ziwano ke tayê derûdorî şuxilnenê, provokatîf û hêrişkar bîyayîşê nê ziwanî zî nê amacî ra cîya nîyo.
Namekerdişê prosesî de bi israr vatişê “Tirkîyaya Bêterore”, şîrovkerdişê babetanê sey huqûqê averşîyayîşî, entegrasyono demokratîk, qanûno taybet goreyê menfaatan, vengkerdişê zereyê nê terîman û raye ra vetişê manaya înan; yeno texmînkerdiş ke hewldayîşê winasînî do zêde bibê.
Seba ke prosesê “Aştîye û Komelê Demokratîkî” goreyê manaya xo ya raşte rayîr şêro, ganî semedê vejîyayîşê meseleya kurdî bi hawayêko kokdar, wêrek û objektîf bêrê destgirewtiş. Zîhnîyeto ke gengeşekerdişê polîtîkayanê înkar û îmha yê vera şarê kurdî ra remeno û israr keno ke mesele tena bi bêçekkerdişî çareser bena û o ke mesele sey meseleya demokratîkbîyayîşê Tirkîya nêvîneno, ganî bêro derbaskerdiş.
Vera mudaxele, şer û nakokîyanê bêçareserîyan yê Rojhelatê Mîyanênî de, Rayberê Şarê Kurdî Abdullah Ocalan wayîrê projeyê çareserîya alternatîfe yo. Çinkerdişê alternatîfanê ke menfaatê şaran rê yê, mimkun o. No proses tena projeyê birayî û entegrasyonî nîyo, eynî wext de projeyêk o ke herême vera hêrişanê hegemonyaya gerdûnî, vera şer û krîzanê ci bipawo û bixelisno; na yew raştîya ke guman qet qebul nêkena.
Azadîya fîzîkîye ya Rayberê Şarê Kurdî Abdullah Ocalanî, seba serkewtişê prosesî sey babeta verêne û bingeyîne dewam kena. Na meseleya ke pêro denklemanê sîyasî, komelkî, ekonomîk û leşkerî yê herême rasterast bedilneno, bi sere de şarê kurdî seba ameyoxê pêro şaranê herême wayîrê girîngîya kifşkerdişî yo.
