Ame zanayene ke girewteyê bi nameyê Yunuz Ozak ke Hepisxaneyê Tîpê S’yî yê Kirşehîrî de yeno girewtene, vindertişo amade qebul nêkerdo, 10 gardîyanan hêrişê ey kerdo û damara destê ey qerifnaya.
Yunus Ozak serra 2016î de qezaya Sûr a Amedî de ame girewtene û cezaya hepsî ya muebedo giran ey rê ameye dayene. Yunus Ozak ke 6 serrî Hepisxaneyê Amedî de ame girewtene, dima ra surgunê Hepisxaneyê Tîpê S’yî yê Kirşehîrî ame kerdene. Yunus Ozak 3 serrî yo Hepisxaneyê Kirşehîrî de yeno girewtene. Ey telefonê keyeyê xo kerd û teda û şîdeto ke ey rê ameyo kerdene, înan rê vat. Birayê Yunus Ozakî Mehmet Ozak derheqê rewşa birayê xo de ajansê ma rê qisey kerd û vat: “Rayberîya hepisxaneyê şarê kurdî ra eciz a. Nê semedî ra tedaya înan kenê.”
‘Dima ke Yûnûsî berd Hepisxaneyê Kirşehîrî teda vêşî bîye’
Mehmet Ozakî dîyar kerd ke birayê ey Yunus Ozak serra 2016î de qezaya Sûrî de ameyo girewtene û vat: “Demo ke Yunus ame girewtene ey ser o çîyê nêvejîya Tu delîlê şênberî çin bîyê. La reyna zî ame girewtene. Birayê mi mehkema de waşt pawitişê xo bi kurmanckî bikero. La dozgerî destur nêda û mehkema zî cezaya muebedo giran daye ey. Nêzdîyê 6 serrî Hepisxaneyê Amedî de mend. Dima ra zî birayê mi erşawit Kirşehîrî. Wexto ke ey berd Kirşehîr ey ser o teda vêşî bîye.”
Damara destê ey qerfinaya
Mehmet Ozakî îfade kerd ke birayê ey bi rayîrê telefonî tedayê ke ey ser o yenê kerdene, kerd û wina qisey kerd: “Her roje gardîyanî şonê hucreya birayê mi gêrayîş kenê. Gardîyanî dest danê mektub û malzemeyanê Yunusî ser o. 3 serrî yo nê gêrayîşî bi eyn şeklî dewam kenê. Birayê mi waşto rayberîya hepixaneyî reyde pêvînayîş bişkero. 15 rojî ra ver mudirê hepisxaneyî vengdayo birayê mi. Biraye mi şono pêvînayîşî. Pêvînayîşî de gardîyanan birayê mi ra vato, ‘wirze û vindertişo amadeyî de vindere.’ Birayê mi zî nê çîyî qebul nêkerdo. Dima ra 10 gardîyanî hêrişê birayê kerdo û damara destê ey qerifnaya. Demo ke mi birayê mi benê nêweşxane ey ra vamê, ‘bi kelemçe tedawî bibe.’ Birayê mi nê qebul nêkerdo û bêyî ke tedawî bibo ey tepa berdo hepisxane. No 15 rojî yo damara destê ey qerifnaye yala ma nêzanê rewşa birayê mi nika senîn a? Ma her roje hepisxaneyî gêrenê la cewab nêdanê ma.”
‘Ma nêwazenê girewteyan rê zilm bêro kerdene’
Mehmet Ozakî dîyar kerd ke girewteyêk ardo qawişê kîşta birayê ey, her roje kurdan rê nengan çîneno û vat: “O girewte serê sibayî ra heta şandî şarê kurdî rê nengan çîneno. No şîdeto psîkolojîk o. Rayberîya hepisxaneyî zî şarê kurdî ra eciz a. Nê semedî ra nê zilmî kenê. Şîdeto fîzkî û psîkolojîk kenê. Dewlete vana proses est o la heto bîn ra zî girewteyan ser o teda vêşî kenê. Eke dewlete çîyêk vaja ganî vatişanê xo ser o vindera. La ma zî vînenê ke hema zî zilm kena. Ma nêwazenê girewteyanê sîyasî ser o zilm bêro kerdene.”
