Mihemed Bîlen ke 50 estanekan ra tena 9-10 estanekî hişê ey de mendê, sebebê nê zî sey extîyarî û averşîyayîşê teknolojîyî pênase keno û vano: “Êdî tu kes kesî nêgoşdareno.”
Komelê Kurdan de cayê estanekvatoxîye xeylê muhîm o. Seba ke bi serran edebîyat yan zî tarîxê kurdan riyê sebebanê bindestî ra hetê nuştekî ra aver nêşîyo, fekî ameyo vatene, vatiş, kultur û tarîxê kurdî bi saya estanek û dengbêjî lingan ser o mendo. Na cuya hemdeme de riyê averşîyayîşê teknolojî ra estanekvatoxî hema vaje ver bi xelasbîyayîşî şona. Labelê hema zî mîyanê komelî de kesê ke estanekan vanê û benê xemlê komelî est ê.
32 serrî yo dewa xo ra koçber bîyê
Nê kesan ra yew zî Mihemed Bîlen o ke qezaya merkezî ya Artêmêt a Wanî de ciwîyeno. Mihemed Bîlen -bi vatişê ey- 70 serrî yo û wendiş û nuştişî qet nêzano. O eslê xo de Dewa Hosyan a girêdayeyê qezaya Xisxêr (Perwarî) ya Sêrtî ra yo û eşîrê Goyanî ra yo. Serra 1993î de dewa înan hetê leşkeranê Tirkîya ra ameya veşnayene û dewijî vila bîyê. O û keyeyê xo zî şîyê Wan û 32 serrî yo ke cehd kenê ke tîya de cuya xo bidomnê.
Estanexê xo datê xo Cindî ra xo ra musayo
Datê Mihemed Bîlen ê bi nameyê Cindî est bîyo û demêkî hepisxaneyê Elezîzî de mendo. Cindî reyde kesê bi nameyê Mihemedê Eyşê mendêne ke Amed ra bîyo. Mihemedê Eyşê kesêkê xwendekar bîyo û girewteyan rê kitabî wendêne. Cindî zî nê estanekî ke kitaban de vîyarenê ezber keno û kombîyayîşê camêrdan yê Hosyanî de înan rê vano. Cindî merdimêkko mêmaperwer beno. O semedî ra dewijî her tim keyeyê ey de ameyêne têhet û serebûtê xo yewbînan rê vatêne. Mihemed Bîlen zî demo ke gede bîyo kombîyayîşanê camêrdan de goşdarîya datê xo keno û nê estanekan ezber keno.
50 estanekan ra tena 9-10 hebî mendê
Mihemed Bîlenî nêzdîyê 50 estanekî datê xo ra musayo la nika 9-10 estanekî vîrê ey de mendê. Mihemed Bîlen sebebê ney sey extîyarî û averşîyayîşê teknolojîyî pênase keno û vano ke dimayê vejîyayîşê televîzyon û telefonan êdî kes kesî nêgoşdareno û pêro şonê televîzyonan temaşe kenê. Seba ke wendiş û nuştişê Mihemed Bîlenî çin o, o nêeşkayo nê estanekan binuso yan zî bianco pêser.
Şîîrî zî xo vîr ra kerdê
Nê estanekan de tarîxê kurdan est o û tayê estanekî ke Mihemed Bîlen zano 4 saetî zî vîyarenê. Ey heme estanekanê xo bi detay zano û bi hewayêko serûber vano. Reyna Mihemed Bîlen şîîr û bendan zî zano û xeylê şîîrê Şêx Ehmedî Repînî zî ezber kerdê. Çareneyêka şîîranê Şêx Ehmedî Repînî ra ke Mihemed Bîlenî seba ma vata wina ya:
Ji Kurdistanê re bibêje her ew e cana cîhan
Çîmenên gazî dikin dê xeyidin qîzên ciwan
Bax û bostanan keziyê bidin wesfê mihan
Ji Kurdê xayîn silbûn beybûn li min mekra dikin
